തിരൂർ: മലയാളം സർവകലാശാലയിൽ 21, 22, 23 തിയതികളിൽ നടക്കുന്ന സാഹിതി സാഹിത്യോത്സവത്തോടനുബന്ധിച്ച് പ്രസിദ്ധ ഫോട്ടോഗ്രാഫർ പുനലൂർ രാജൻ തയാറാക്കിയ സാഹിത്യകാരൻമാരുടെ അപൂർവ ഫോട്ടോകളുടെ പ്രദർശനം നടക്കും. ഐക്യകേരളത്തിന്റെ അറുപത് വർഷം അടയാളപ്പെടുത്തികൊണ്ടു 60 സാഹിത്യകാരൻമാരുടെ ഫോട്ടോകളാണ് പ്രദർശനത്തിൽ ഒരുക്കുക. മേളയ്ക്ക് ശേഷം ചിത്രങ്ങൾ സർവകലാശാലയ്ക്ക് നൽകും. സുപ്രസിദ്ധ സാഹിത്യകാരൻമാരുടെ ജീവിതത്തിലെ അത്യപൂർവ നിമിഷങ്ങളാണ് ബ്ലാക്ക് ആൻഡ് വൈറ്റ് ഫോട്ടോകളുടെ ആചാര്യനായ പുനലൂർ രാജൻ കാമറയിൽ പകർത്തിയിരിക്കുന്നത്. ബഷീർ, തകഴി, കേശവദേവ്, എസ്.കെ. പൊറ്റക്കാട്, ഉറൂബ്, വി.ടി.ഭടതിരിപ്പാട്, ഇടശേരി, വൈലോപ്പിള്ളി, മുണ്ടശേരി, വയലാർ, എം.ടി, ബാലാമണിഅമ്മ, മാധവിക്കുട്ടി, വി.കെ.എൻ, സുകുമാർ അഴീക്കോട്, എൻ.പി. മുഹമ്മദ്, കാക്കനാടൻ, ചെറുകാട്, സക്കറിയ, ഒ.എൻ.വി, കടമ്മിനിട്ട, പി. ഭാസ്കരൻ, അക്കിത്തം തുടങ്ങിയവരുടെ ചിത്രങ്ങൾ പ്രദർശനത്തിലുണ്ടാകും