നർക്കിലക്കാട്: മലയോരത്തെ പ്രമുഖ കമ്യൂണിസ്റ്റ്, കർഷകനേതാവ് എളേരിത്തട്ടിലെ മനിയേരി കുഞ്ഞന്പു നായർക്ക് നാടിന്റെ അന്ത്യാഞ്ജലി. ഭീമനടി ഇഎംഎസ് ഭവൻ, നർക്കിലക്കാട് കാനാ കുഞ്ഞികൃഷ്ണൻ സ്മാരക ഗ്രന്ഥാലയം, എളേരിത്തട്ട് എകെജി സ്മാരക വായനശാല എന്നിവിടങ്ങളിൽ മൃതദേഹം ഇന്നലെ പൊതുദർശനത്തിനുവച്ചപ്പോൾ അന്ത്യാഞ്ജലിയർപ്പിക്കാൻ ആയിരങ്ങളെത്തി. സിപിഎം എളേരി ഏരിയ കമ്മിറ്റിയംഗം, കർഷകസംഘം ജില്ലാകമ്മിറ്റിയംഗം, വെസ്റ്റ് എളേരി പഞ്ചായത്തംഗം എന്നീ നിലകളിൽ പ്രവർത്തിച്ചിരുന്നു. സംസ്കാരത്തിനുശേഷം നടന്ന അനുശോചനയോഗത്തിൽ എം.രാജഗോപാലൻ എംഎൽഎ അധ്യക്ഷതവഹിച്ചു. പി.കരുണാകരൻ എംപി, എം.വി.ബാലകൃഷ്ണൻ, പി.ആർ.ചാക്കോ, എ.സി.ജോസ്, ജാതിയിൽ അസിനാർ, കെ.എസ്.കുര്യാക്കോസ്, ടി.സി.രാമചന്ദ്രൻ എന്നിവർ പ്രസംഗിച്ചു.