കേരളത്തെ ഭയപ്പെടുത്തിയ നിപ വൈറസ് കാലത്തിന്റെ കഥ പറയുന്ന ചിത്രമായ വൈറസ് പ്രദർശനത്തിന് ഒരുങ്ങുന്നു. ആഷിഖ് അബു ആണ് ചിത്രം സംവിധാനം ചെയ്യുന്നത്. നീണ്ട ഇടവേളയ്ക്കുശേഷം രണ്ടു നടിമാർ മലയാള സിനിമയിലേക്ക് ഈ ചിത്രത്തിലൂടെ തിരിച്ചെത്തുകയാണ്.
പൂർണിമ ഇന്ദ്രജിത്തും രമ്യ നന്പീശനുമാണ് അത്. ചിത്രത്തിൽ ജോജു അവതരിപ്പിക്കുന്ന കഥാപാത്രത്തിന്റെ ഭാര്യയായിട്ടാണ് രമ്യ അഭിനയിക്കുന്നത്. ആശുപത്രി ജീവനക്കാരനായിട്ടാണ് ജോജു വേഷമിടുന്നത്. രമ്യ അധികം സീനുകളിൽ ഇല്ലെങ്കിലും ഉള്ളത് അത്രയും പ്രധാനപ്പെട്ട രംഗങ്ങളാണ്.
2015ൽ റിലീസ് ചെയ്ത സൈഗാൾ പാടുകയാണ് എന്ന സിനിമയിലായിരുന്നു രമ്യ ഒടുവിലായി മലയാളത്തിൽ പ്രത്യക്ഷപ്പെട്ടത്. മലയാളത്തിൽ സജീവമായിരുന്നില്ലെങ്കിലും തമിഴിലും തെലുങ്കിലും രമ്യയ്ക്ക് ചിത്രങ്ങളുണ്ടായിരുന്നു.
ആഷിഖ് അബുവും ഭാര്യ റിമ കല്ലിങ്കലും ചേർന്നാണ് ചിത്രം നിർമിക്കുന്നത്. ചിത്രത്തിൽ കുഞ്ചാക്കോ ബോബൻ, ഇന്ദ്രജിത്ത്, രേവതി, ടൊവിനോ തോമസ്, റിമ കല്ലിങ്കൽ, ആസിഫ് അലി, പാർവതി, സൗബിൻ ഷാഹിർ, ദിലീഷ് പോത്തൻ, ചെന്പൻ വിനോദ് തുടങ്ങി വൻതാരനിരയാണ് അണിനിരക്കുന്നുന്നത്.
സുഡാനി ഫ്രം നൈജീരിയയുടെ തിരക്കഥയൊരുക്കിയ മുഹ്സിൻ പരാരിയും സുഹാസ് ഷറഫുമാണ് വൈറസിന്റെ തിരക്കഥയെഴുതിയത്. രാജീവ് രവിയാണ് കാമറ. ചിത്രം ജൂണ് ഏഴിന് തിയറ്ററുകളിലെത്തും.
പൂർണിമയും രമ്യയും തിരിച്ചെത്തുന്നു
09:31 AM May 28, 2019 | Deepika.com