ഗ്രീൻ സോണായിമാറിയെങ്കിലും കോവിഡിനെതിരായ പോരാട്ടത്തിൽ ഇനിയും ഏറെ ദൂരം പോകാനുണ്ടെന്ന് ഗോവ മുഖ്യമന്ത്രി പ്രമോദ് സാവന്ത്. കൊറോണ വൈറസ് വ്യാപനത്തിനെതിരെ ജനങ്ങളുടെ പോരാട്ടമാണ് സംസ്ഥാനത്തെ കോവിഡ് മുക്തമാക്കിയതെന്നും അദ്ദേഹം പറഞ്ഞു.
കേന്ദ്രസർക്കാർ ഗോവയെ ഗ്രീൻ സോണായി പ്രഖ്യാപിച്ചതായി അദ്ദേഹം അറിയിച്ചു. ലോക്ക്ഡൗൺ അവസാനിക്കുന്ന മെയ് മൂന്നുവരെ മാസ്ക്കുകൾ ധരിക്കുകയും സാമൂഹിക അകലം പാലിക്കുകയും വേണമെന്ന് ജനങ്ങളോട് അദ്ദേഹം അഭ്യർഥന നടത്തി.
കൊറോണയ്ക്കെതിരായി യുദ്ധത്തിലേർപ്പെട്ടിരുന്നവരുടെ പരിശ്രമവും ജനങ്ങളുടെ പിന്തുണയും മൂലം സംസ്ഥാനത്തെ കേന്ദ്രം ഗ്രീൻ സോണായി പ്രഖ്യാപിച്ചിരിക്കുകയാണ്. എന്നാൽ കോവിഡിനെതിരായ യുദ്ധം അവസാനിച്ചിട്ടില്ലെന്നും സാവന്ത് ട്വിറ്ററിൽ കുറിച്ചു.
സുരക്ഷിതമായ ആരോഗ്യ മാനദണ്ഡങ്ങൾക്ക് മുൻഗണന നൽകുന്ന പുതിയ ജീവിതശൈലി സ്വീകരിച്ച് കോവിഡിനെതിരായ പോരാട്ടം തുടരണമെന്നും അദ്ദേഹം പറഞ്ഞു. ഗോവയിൽ ഏഴ് കോവിഡ് കേസുകൾ മാത്രമാണ് റിപ്പോർട്ട് ചെയ്തത്. ഏപ്രിൽ മൂന്നിന് ശേഷം സംസ്ഥാനത്ത് പുതിയ കോവിഡ് കേസുകൾ റിപ്പോർട്ട് ചെയ്തിരുന്നില്ല.
ഗ്രീനായി ഗോവ; കോവിഡിനെതിരായ പോരാട്ടം തുടരണമെന്ന് മുഖ്യമന്ത്രി
07:13 PM May 01, 2020 | Deepika.com