കോവിഡ് -19 വൈറസ് ബാധ മൂലം സൗദി അറേബ്യയിൽ ആകെ മരണങ്ങൾ 109 ഉം ഇതുവരെ രോഗം ബാധിച്ചവരുടെ എണ്ണം 11,631 മായി. 24 മണിക്കൂറിനുള്ളിൽ സ്ഥിരീകരിച്ച രോഗികളുടെ എണ്ണം 1,122 ആണ്. 402 പേർക്ക് പുതുതായി രോഗം സ്ഥിരീകരിച്ച മക്കയാണ് പട്ടികയിൽ ഒന്നാമത്. റിയാദ് (200), ജിദ്ദ (186), മദീന (120), ദമ്മാം (78), ഹൊഫൂഫ് (63), ജുബൈൽ (39), തായിഫ് (16), അൽഖോബാർ (05) എന്നിങ്ങനെയാണ് മറ്റു പ്രവിശ്യകളിലെ പുതിയ രോഗികളുടെ കണക്ക്.
1490 പേർക്ക് ഇതുവരെ രോഗം സുഖപ്പെട്ടു. തിങ്കളാഴ്ച മരിച്ചവരിൽ അഞ്ച് പേർ മക്കയിലും ഒരാൾ ജിദ്ദയിലുമാണ്. കോവിഡ് 19 വൈറസിനെ ഫലപ്രദമായി പ്രതിരോധിക്കാൻ രാജ്യത്തെ ആരോഗ്യ മന്ത്രാലയത്തിന് സൽമാൻ ബിൻ അബ്ദുൽ അസീസ് രാജാവ് 4,700 കോടി റിയാൽ കൂടി നൽകുന്നതായി പ്രഖ്യാപിച്ചു. പ്രതിരോധ പ്രവർത്തനങ്ങൾ കൂടുതൽ ശക്തമാക്കുമെന്നും രാജ്യത്തെ വൈകാതെ വൈറസ് മുക്തമാക്കുമെന്നും ആരോഗ്യ വകുപ്പ് മന്ത്രി ഡോ. തൗഫീഖ് അൽറബീഅ അറിയിച്ചു. കഴിഞ്ഞ ദിവസങ്ങളിൽ നടന്ന ഫീൽഡ് പരിശോധനകൾ ഫലപ്രദമാണെന്ന് അദ്ദേഹം പറഞ്ഞു. രാജ്യത്തെ ലേബർ ക്യാമ്പുകളിൽ പരിശോധന നടത്താൻ തൊഴിലുടമകളോട് അനുമതി ആവശ്യപ്പെട്ടതായും അദ്ദേഹം പറഞ്ഞു.
ഫീൽഡ് ടെസ്റ്റിങ്ങിലൂടെ തിങ്കളാഴ്ച മാത്രം 874 പേരിൽ രോഗം കണ്ടെത്തിയതായി ആരോഗ്യ മന്ത്രാലയം അറിയിച്ചു. ഇതിൽ 23 ശതമാനം സ്ത്രീകളാണ്. റംസാനിലും തുടർന്നും ജനങ്ങൾക്ക് ആവശ്യത്തിനുള്ള ഭക്ഷണ സാധനങ്ങൾ സ്റ്റോക് ഉള്ളതായി ഭക്ഷ്യ വകുപ്പ് അറിയിച്ചു. പ്രാർഥനകൾക്ക് വീടുകളിൽ തന്നെ കഴിയണം ചൊവ്വാഴ്ച മുതൽ രാജ്യത്ത് അടിയന്തര സാഹചര്യത്തിലുള്ള യാത്രകൾക്ക് ഏകീകൃത കർഫ്യു പാസ് സമ്പ്രദായം നിലവിൽ വരും. മേയ് പത്താം തിയതി മുതൽ സൂപ്പർ മാർക്കറ്റുകളിൽ ഓൺലൈൻ പേയ്മെന്റ് സംവിധാനം ഏർപ്പെടുത്തും.
ഷക്കീബ് കൊളക്കാടൻ
സൗദിയിൽ രോഗികളുടെ എണ്ണം 11,631 കടന്നു
11:15 AM Apr 22, 2020 | Deepika.com