ലോക്ക് ഡൗണ് പ്രഖ്യാപിച്ച സാഹചര്യത്തില് സാമ്പത്തിക പ്രതിസന്ധി നേരിടുന്ന അഭിഭാഷകര്ക്കു ധനസഹായം നല്കാന് 50 ലക്ഷം രൂപയുടെ ഫണ്ടിന് രൂപം നല്കാന് കേരള ബാര് കൗണ്സില് തീരുമാനിച്ചു.
അഭിഭാഷക ക്ഷേമനിധിയില് അംഗങ്ങളല്ലാത്ത വക്കീലന്മാര്ക്കും ഫണ്ടില്നിന്നു സഹായം ലഭിക്കും. ക്ഷേമനിധിയില് അംഗങ്ങളായ വക്കീലന്മാര്ക്ക് ഒരു വര്ഷംകൊണ്ടു തിരിച്ചടയ്ക്കാന് കഴിയുന്ന തരത്തില് 10,000 രൂപ വരെ പലിശരഹിത വായ്പ നല്കുമെന്നും ബാര് കൗണ്സില് ഹൈക്കോടതിയില് അറിയിച്ചു.
ധനസഹായത്തിനായി രൂപം നല്കുന്ന ഫണ്ടിലേക്ക് കേന്ദ്ര സംസ്ഥാന സര്ക്കാരുകള്, ബാര് കൗണ്സില് ഓഫ് ഇന്ത്യ, വിവിധ ബാര് അസോസിയേഷനുകള്, പൊതുജനങ്ങള്, അഭിഭാഷകര് തുടങ്ങിയവരില്നിന്നു പണം സമാഹരിക്കും.
ലോക്ക് ഡൗണിന്റെ പശ്ചാത്തലത്തിൽ അഭിഭാഷകര്ക്കു ധനസഹായം നല്കണമെന്നാവശ്യപ്പെട്ടു കേരള ബാര് കൗണ്സില് അംഗങ്ങളായ അഡ്വ. മുഹമ്മദ് ഷാ, പി. അബു സിദ്ദിഖ് എന്നിവര് നല്കിയ ഹര്ജിയിലാണ് ബാര് കൗണ്സില് വിശദീകരണം നല്കിയത്.
സാമ്പത്തിക സഹായത്തിനായി ഇതുവരെ 1500 അപേക്ഷകള് ലഭിച്ചെന്നും അഭിഭാഷകര്ക്ക് ഏപ്രില് 20 വരെ ഇ മെയില് മുഖേന ധനസഹായത്തിന് അപേക്ഷ നല്കാമെന്നും വിശദീകരണത്തില് പറയുന്നു.
അഭിഭാഷകര്ക്കു സഹായം നല്കാന് 50 ലക്ഷം രൂപയുടെ ഫണ്ട്
04:56 PM Apr 17, 2020 | Deepika.com