യൂണിയന്‍ പബ്ലിക് സര്‍വീസ് കമ്മീഷന്‍ (യുപിഎസ്‌സി) നിശ്ചയിച്ചിരുന്ന പരീക്ഷകളുടെയും അഭിമുഖങ്ങളുടെയും റിക്രൂട്ട്മെന്‍റ് ബോര്‍ഡുകളുടെയും തിയതി പുനഃക്രമീകരിക്കാന്‍ തീരുമാനിച്ചു. ഉദ്യോഗാര്ഥികള്ക്ക് പരീക്ഷാകേന്ദ്രങ്ങളില്‍ എത്തിച്ചേരാന്‍ കഴിയാത്തത് കണക്കിലെടുത്താണ് തീരുമാനം. ശേഷിക്കുന്ന സിവില്‍ സര്‍വീസ് 2019 പേഴ്സണാലിറ്റി ടെസ്റ്റിന്‍റെ തീയതി മേയ് മൂന്നിന് ശേഷം പ്രഖ്യാപിക്കും.
സിവില്‍ സര്‍വീസസ്-2020 (പ്രിലിമിനറി), എൻജിനിയറിംഗ് സര്‍വീസസ് (മെയിന്‍), ജിയോളജിസ്റ്റ് സര്‍വീസസ് (മെയിന്‍) പരീക്ഷകളുടെ തീയതി നേരത്തെ പ്രഖ്യാപിച്ചിരുന്നു. കോവിഡ് വ്യാപനത്തെ തുടര്‍ന്ന് ഈ പരീക്ഷകള്‍ മാറ്റിവയ്ക്കേണ്ടി വന്നാല്‍ അത് യുപിഎസ്‌സിയുടെ വെബ്സൈറ്റില്‍ പ്രസിദ്ധീകരിക്കും. കമ്പൈന്‍ഡ് മെഡിക്കല്‍ സര്‍വീസസ്, ഇന്ത്യന്‍ ഇക്കണോമിക് സര്‍വീസ്, ഇന്ത്യന്‍ സ്റ്റാറ്റിസ്റ്റിക്കല്‍ സര്‍വീസ് പരീക്ഷകള്‍ ഇതിനോടകം മാറ്റിവച്ചിട്ടുണ്ട്.
സിഎപിഎഫ് 2020 പരീക്ഷയുടെ തിയതി യുപിഎസ്‌സി വെബ്സൈറ്റില്‍ പ്രസിദ്ധീകരിക്കും. നാഷണല്‍ ഡിഫന്‍സ് അക്കാഡമി (എന്‍ഡിഎ1) പരീക്ഷ ഇനിയൊരറിയിപ്പ് ഉണ്ടാകുന്നതു വരെ മാറ്റിവെച്ചിട്ടുണ്ട്. എന്‍ഡിഎ രണ്ട് പരീക്ഷ സംബന്ധിച്ച തീരുമാനം വിജ്ഞാപനം പുറത്തിറക്കാന്‍ നിശ്ചയിച്ചിരുന്ന ജൂണ്‍ 10 ന് പരസ്യപ്പെടുത്തും. യുപിഎസ്‌സിയുടെ മറ്റു പരീക്ഷകള്‍, അഭിമുഖങ്ങള്‍ എന്നിവ സംബന്ധിച്ച തീരുമാനങ്ങള്‍ വെബ്സൈറ്റില്‍ പ്രസിദ്ധീകരിക്കും.
യുപിഎസ്‌സി പരീക്ഷകളും അഭിമുഖങ്ങളും പുനഃക്രമീകരിക്കും
01:53 PM Apr 16, 2020 | Deepika.com