ഹൈഡ്രോക്സി ക്ലോറോക്വിൻ മരുന്നിന്റെ കയറ്റുമതി നിരോധിച്ച് കേന്ദ്ര സർക്കാർ. കോവിഡ്-19നെ ചെറുക്കാൻ ഇന്ത്യൻ കൗണ്സിൽ ഓഫ് മെഡിക്കൽ റിസർച്ച് നിർദ്ദേശിച്ച മരുന്നാണിത്.
ആഭ്യന്തര വിപണിയിൽ മരുന്നുലഭ്യത ഉറപ്പാക്കുന്നതിന്റെ ഭാഗമായാണ് അടിയന്തര തീരുമാനം. വാണിജ്യ മന്ത്രാലയത്തിന്റെ കീഴിലുള്ള ഡയറക്ടറേറ്റ് ജനറൽ ഓഫ് ഫോറിൻ ട്രേഡ് (ഡിജിഎഫ്ടി) ഡയറക്ടർ ജനറലാണ് ഇതു സംബന്ധിച്ച് ഉത്തരവു പുറത്തിറക്കിയത്. അടിയന്തര സാഹചര്യങ്ങളിൽ വിദേശ കാര്യമന്ത്രാലയത്തിന്റെ ശിപാർശയുണ്ടെങ്കിൽ കയറ്റുമതിക്ക് അനുമതിയുണ്ടാവുമെന്നും അറിയിപ്പിൽ പറയുന്നു.
മലേറിയ ഒഴിവാക്കാനും ചികിത്സിക്കാനും ഉപയോഗിച്ചിരുന്ന ഹൈഡ്രോക്സി ക്ലോറോക്വിൻ കോവിഡിനും ഫലപ്രദമാണെന്നു കഴിഞ്ഞദിവസം ഇന്ത്യൻ കൗണ്സിൽ ഓഫ് മെഡിക്കൽ റിസർച്ച് ഡയറക്ടർ ജനറൽ ബൽറാം ഭാർഗവ് പറഞ്ഞിരുന്നു. കോവിഡ് രോഗികളെയോ രോഗം സംശയിച്ചവരെയോ ചികിത്സിക്കുന്നവർ, വീട്ടിൽ ക്വാറന്ൈറൻ ചെയ്യപ്പെട്ട രോഗികളുമായി ഇടപഴകിയവർ എന്നിവർക്കാണു മരുന്നു നൽകുക.
അമേരിക്കൻ പ്രസിഡന്റ് ഡോണൾഡ് ട്രംപ് ഈ മരുന്ന് കോവിഡ്-19 ചികിത്സയ്ക്കു ഫലപ്രദമാണെന്ന് അഭിപ്രായപ്പെട്ടതിനു പിന്നാലെയാണു മരുന്നിന് ആവശ്യക്കാരേറിയത്. നിലവിൽ വാക്സിനോ മരുന്നോ കണ്ടുപിടിച്ചിട്ടില്ലാത്ത രോഗമാണു കോവിഡ്-19.
ഹൈഡ്രോക്സി ക്ലോറോക്വിൻ മരുന്നിന്റെ കയറ്റുമതി നിരോധിച്ച് കേന്ദ്ര സർക്കാർ
06:36 PM Mar 25, 2020 | Deepika.com