കോവിഡ് 19 സ്ഥിരീകരിച്ച് കോട്ടയം മെഡിക്കൽ കോളജിൽ ചികിത്സയിൽ കഴിയുന്ന നാലുപേരുടെയും ആരോഗ്യനില കൂടുതൽ മെച്ചപ്പെട്ടു. റാന്നി ഐത്തല സ്വദേശികളായ വയോധികരായ ദന്പതികളും ഇവരുടെ അടുത്ത ബന്ധുക്കളായ തിരുവാർപ്പ് ചെങ്ങളം സ്വദേശികളായ യുവദന്പതികളുമാണ് മെഡിക്കൽ കോളജിലെ ഐസൊലേഷൻ വാർഡിൽ കഴിയുന്നത്.
യുവദന്പതികളുടെ നാലര വയസുള്ള മകൾക്ക് രോഗം ബാധിച്ചില്ലെന്ന് നേരത്തെ പരിശോധനയിൽ വ്യക്തമായിരുന്നു. ഇതിനിടയിൽ ഞായറാഴ്ച വൈകുന്നേരം ചെങ്ങളത്തുനിന്ന് ഒരു വയസുള്ള കുട്ടിയെയും റാന്നി പഴവങ്ങാടിയിൽനിന്ന് 36 വയസുള്ള യുവതിയേയും ഐസലേഷൻ വാർഡിൽ പ്രവേശിപ്പിച്ചിരിക്കുകയാണ്.
ഇവരുടെ രക്ത, സ്രവ സാന്പിളുകളുടെ പരിശോധനാ ഫലം 48 മണിക്കൂറിനകം ലഭിക്കും. ഞായറാഴ്ച രണ്ടുപേർ കൂടി ഐസലേഷൻ വാർഡിൽ എത്തിയതോടെ ഇവിടെ കഴിയുന്നവരുടെ എണ്ണം 11 ആയി.
രോഗലക്ഷണവുമായി നിരീക്ഷണത്തിൽ കഴിഞ്ഞിരുന്ന രണ്ടുപേരെ ശനിയാഴ്ച ആശുപത്രിയിൽ നിന്നും വിട്ടയച്ചിരുന്നു. രോഗം പൂർണമായും മാറിയാലും ആരോഗ്യവകുപ്പ് നിർദ്ദേശിച്ചിട്ടുള്ള 28 ദിവസം കഴിഞ്ഞെങ്കിൽ മാത്രമേ ഇവർക്ക് മറ്റുള്ളവരുമായി സന്പർക്കം പുലർത്താൻ കഴിയൂ.
കോട്ടയത്ത് ചികിത്സയിലുള്ള കോവിഡ് 19 ബാധിതർ സുഖം പ്രാപിക്കുന്നു
03:08 PM Mar 16, 2020 | Deepika.com