രാജ്യത്ത് കോവിഡ്-19 ബാധിച്ച് ആദ്യത്തെ മരണം കർണാടകയിൽ. കൽബുർഗിയിൽ ചൊവ്വാഴ്ച എഴുപത്തിയാറുകാരൻ മരിച്ചത് കോവിഡ്-19 ബാധിച്ചാണെന്നു സ്ഥിരീകരിച്ചു. മതപണ്ഡിതനായ മുഹമ്മദ് ഹുസൈൻ സിദ്ദിഖിയാണ് ചൊവ്വാഴ്ച രാത്രി 11 ഓടെ മരിച്ചത്.
ജനുവരി 29നാണ് ഇദ്ദേഹം സൗദിക്കു പോയത്. ഫെബ്രുവരി 29ന് മടങ്ങുകയും ചെയ്തു. രക്തസാന്പിളുകളുടെ പരിശോധനാഫലം ഇന്നലെ വന്നതോടെയാണ് മരണകാരണം കോവിഡ് ആണെന്ന് സ്ഥിരീകരിച്ചത്. ബുധനാഴ്ച വൈകുന്നേരം മൃതദേഹം കബറടക്കിയിരുന്നു.
രാജ്യത്ത് ഇതുവരെ 74 പേർക്ക് കോവിഡ് - 19 സ്ഥിരീകരിച്ചു. ഇതിൽ 57 ഇന്ത്യക്കാരും 17 വിദേശികളുമാണെന്നു കേന്ദ്ര ആരോഗ്യ മന്ത്രാലയത്തിന്റെ പ്രസ്താവനയിൽ അറിയിച്ചു. ആറുപേർ ഡൽഹിയിലാണ്. കേരളത്തിൽ -17, ഹരിയാനയിൽ -14, രാജസ്ഥാനിൽ ഒരു വിദേശി ഉൾപ്പെടെ രണ്ട്, ഉത്തർപ്രദേശിൽ ഒരു വിദേശി ഉൾപ്പടെ 11, ലഡാക്കിൽ മൂന്ന്, തെലുങ്കാനയിലും തമിഴ്നാട്ടിലും ജമ്മു കാഷ്മീരിലും പഞ്ചാബിലും ഒാരോന്നു വീതം, കർണാടകയിൽ നാല്, മഹാരാഷ്ട്രയിൽ 11 പേർ എന്നിങ്ങനെയാണ് രോഗം സ്ഥിരീകരിച്ചവരുടെ എണ്ണം. ലോക്സഭാ സമ്മേളനം നേരത്തേ അവസാനിപ്പിക്കുന്നതു സംബന്ധിച്ച് തീരുമാനമെടുത്തിട്ടില്ലെന്ന് സ്പീക്കർ ഓം ബിർള പറഞ്ഞു.
ഇന്ത്യയിലെ ആദ്യ കോവിഡ് മരണം കർണാടകത്തിൽ
01:55 PM Mar 13, 2020 | Deepika.com