മൂവാറ്റുപുഴ: വിദ്യാഭ്യാസ ജില്ലയിലെ വിവിധ സ്കൂളുകളിലെ നിർധനരായ കുട്ടികൾക്ക് നിർമല ഹയർ സെക്കൻഡറി സ്കൂളിലെ 1988ലെ പൂർവ വിദ്യാർഥി കൂട്ടായ്മയായ ‘നാം-88’ന്റെ നേതൃത്വത്തിൽ പഠനോപകരണങ്ങൾ വിതരണം ചെയ്തു. മൂവാറ്റുപുഴ നിർമല ഹയർ സെക്കൻഡറി സ്കൂളിൽ നടന്ന പരിപാടി മുൻ ഹൈക്കോടതി ചീഫ് ജസ്റ്റിസ് സി.എൻ. രാമചന്ദ്രൻ നായർ ഉദ്ഘാടനം ചെയ്തു. പഠനോപകരണങ്ങളുടെ വിതരണോദ്ഘാടനം മാത്യു കുഴൽനാടൻ എംഎൽഎ നിർവഹിച്ചു. 150ൽ അധികം വരുന്ന വിദ്യാർഥികൾക്ക് ബാഗ്, കുട, ലഞ്ച് ബോക്സ്, വാട്ടർ ബോട്ടിൽ, പേന, പെൻസിൽ, ബുക്ക്, തുടങ്ങി 3500 രൂപയോളം വരുന്ന പഠനോപകരണ കിറ്റുകളാണ് വിതരണം ചെയ്തത്. ചടങ്ങിൽ ‘നാം88’ വൈസ് പ്രസിഡന്റുമാരായ പ്രദീഷ് കെ. ഫിലിപ്പ്, കെ.എം. ഷീന, മുൻ പ്രസിഡന്റുമാരായ ഒ.വി. അനീഷ്, ജോണ് വർഗീസ്, നിർമല ഹയർ സെക്കൻഡറി സ്കൂൾ പ്രിൻസിപ്പൽ റവ.ഡോ. ആന്റണി പുത്തൻകുളം, സെക്രട്ടറി ബേബി വർഗീസ്, ട്രഷറർ എസ്. പ്രജിത്ത്, വിനോദ് ബാബു എന്നിവർ പ്രസംഗിച്ചു. വിവിധ അനാഥാലയങ്ങളിൽ ലൈബ്രറി സ്ഥാപിക്കുന്നതിന്റെ ഭാഗമായി പുസ്തകങ്ങളും ചടങ്ങിൽ കൈമാറി.