കൊരട്ടി: വെസ്റ്റ് കൊരട്ടി ഫാത്തിമ മാതാ പള്ളിയിൽ പരിശുദ്ധ ഫാത്തിമ മാതാവിന്റെയും വിശുദ്ധ സെബസ്ത്യാനോസിന്റെയും തിരുനാളിന് കൊടിയേറി. കൊടിയേറ്റിനും തുടർന്ന് നടന്ന ആഘോഷമായ വിശുദ്ധ കുർബാനയ്ക്കും കൊരട്ടി ഫൊറോന വികാരി ഫാ.ജോസ് ഇടശേരി കാർമികനായി. വിശുദ്ധ സെബസ്ത്യാനോസിന്റെ തിരുനാൾ ദിനമായ ഇന്ന് രാവിലെ 6.30 ന് ആഘോഷമായ വിശുദ്ധ കുർബാനക്ക് ഫാ.ആൻസിൽ മല്പ്പാൻ നേതൃത്വം നൽകും. ഉച്ചതിരിഞ്ഞ് രണ്ടിന് വീടുകളിലേക്ക് അന്പ് എഴുന്നള്ളിപ്പ്. രാത്രി 8.30ന് അന്പുകൾ പള്ളിയിലെത്തും. തുടർന്ന് ലദീഞ്ഞും ആകാശവിസ്മയവും ഉണ്ടായിരിക്കും. ഫാത്തിമ മാതാവിന്റെ തിരുനാൾ ദിനമായ നാളെ രാവിലെ ഏഴിന് ദിവ്യബലി. 10 ന് നടക്കുന്ന ആഘോഷമായ തിരുനാൾ പാട്ടുകുർബാനക്ക് ഫാ.ജോയ്സണ് പുതുശേരി നേതൃത്വം നൽകും. ഫാ.രാജൻ പുന്നയ്ക്കൽ വചനസന്ദേശം നൽകും. തുടർന്ന് പ്രദക്ഷിണം, വൈകീട്ട് ഏഴിന് ഗാനമേളയും സംഘടിപ്പിച്ചിട്ടുണ്ട്.