ബർലിൻ: നൂറ്റിഒന്നാമത് ജർമൻ കത്തോലിക്കാദിനം ജർമനിയിലെ മ്യുൻസ്റ്ററിൽ വിപുലമായ പരിപാടികളോടെ ആഘോഷിച്ചു. മേയ് 9 ന് ആരംഭിച്ച ആഘോഷങ്ങൾ ജർമൻ പ്രസിഡന്റ് ഡോ.ഫ്രാങ്ക് വാൾട്ടർ സ്റ്റൈൻമയറാണ് ഉദ്ഘാടനം ചെയ്തത്.
13 ന് സമാപനദിനത്തിലെ ദിവ്യബലിയിൽ ഒരു ലക്ഷത്തോളം വിശ്വാസികൾ പങ്കെടുത്തു. ജർമൻ ബിഷപ്സ് കോണ്ഫറൻസ് അധ്യക്ഷനും മ്യൂണിക്കിലെ കർദിനാളുമായ റെയ്നാർഡ് മാർക്സ് സമാപന ദിനത്തിലെ ദിവ്യബലിയിൽ മുഖ്യകാർമ്മികനായി. അദ്ദേഹം നടത്തിയ വചനപ്രഘോഷണത്തിൽ ലോകത്തിന്റെ വിവിധ ഭാഗങ്ങളിൽ സംഘർഷം നിലനിൽക്കുകയാണെങ്കിലും പ്രതീക്ഷ കൈവിടാതെ ദൈവത്തോടു ചേർന്നു നിന്ന് സമാധാനം കൈവരാൻ പ്രാർത്ഥിയ്ക്കണമെന്നും ആഹ്വാനം ചെയ്തു. സൈനിക നടപടികളിലൂടെ സമാധാനം സാധ്യമാക്കാൻ സാധിക്കില്ല. ക്രിസ്ത്യാനികളും ക്രിസ്ത്യൻ പള്ളികളും സമാധാനത്തിന്റെ ഉപകരണങ്ങളായി മാറണമെന്നും അദ്ദേഹം ഉപദേശിച്ചു. ജർമനിയിൽ കത്തോലിക്കാ വിശ്വാസികളുടെ എണ്ണം കുറയുന്നതിൽ കർദ്ദിനാൾ ആശങ്ക അറിയിച്ചു. ജനസംഖ്യയുടെ 28 ശതമാനം കത്തോലിക്കരും 26 ശതമാനം പ്രൊട്ടസ്റ്റന്റുകാരുമാണ് ജർമനിയിലുള്ളത്. ജർമനിയിലെ ആകെ ജനസംഖ്യ 82,67 മില്യണാണ്.
ജർമനിയിൽ കത്തോലിക്കാ ദിനാഘോഷം സമാപിച്ചു
11:20 PM May 14, 2018 | Deepika.com