അഞ്ചു വയസുകാരൻ വെടിയേറ്റു മരിച്ചു; യുവതിയും യുവാവും അറസ്റ്റിൽ

ഡെന്നിസണ്‍ (ടെക്സസ്): നോർത്ത് ടെക്സസിൽ അഞ്ചു വയസുകാരൻ വെടിയേറ്റു മരിച്ച സംഭവത്തിന് ഉത്തരവാദികളെന്ന് സംശയിക്കുന്ന രണ്ടുപേരെ പോലീസ് പിടികൂടി. റയൻ ക്ലെ (18) സബ്രീന (17) എന്നീ രണ്ടു പേരാണ് അറസ്റ്റിലായതെന്ന് പോലീസ് അറിയിച്ചു. ഇവർക്കെതിരെ കൊലകുറ്റത്തിന് കേസെടുത്തിട്ടുണ്ട്.

നവംബർ 19 ന് രാത്രി 11 നായിരുന്നു സംഭവം. വെസ്റ്റ് ഈലം സ്ട്രീറ്റിലെ വീട്ടിൽ കളിക്കുകയായിരുന്ന അഞ്ചു 11 ഉം വയസ് പ്രായമുള്ള രണ്ടു കുട്ടികൾക്കാണ് വെടിയേറ്റത്. ഇവരെ ഡാളസ് ഏരിയാ ആശുപത്രിയിൽ പ്രവേശിപ്പിച്ചുവെങ്കിലും അഞ്ചു വയസുകാരൻ മരിക്കുകയായിരുന്നു.

വെടിവയ്പിനുണ്ടായ സാഹചര്യം അന്വേഷിച്ചു വരികയാണെന്ന് ഡെന്നിസണ്‍ പോലീസ് പറഞ്ഞു. കൂടുതൽ അറസ്റ്റ് ഉണ്ടാകുമെന്നും പോലീസ് കൂട്ടിചേർത്തു. കൂടുതൽ വിവരങ്ങൾ വെളിപ്പെടുത്തുവാൻ പോലീസ് വിസമ്മതിച്ചു. സംഭവത്തെക്കുറിച്ച് വിവരം ലഭിക്കുന്നവർ 903 465 2422 എന്ന നന്പരിൽ അറിയിക്കണമെന്ന് പോലീസ് അഭ്യർഥിച്ചു.

റിപ്പോർട്ട്: പി.പി. ചെറിയാൻ