യുക്മ യുഗ്രാൻഡ് വിജയികൾക്ക് സമ്മാനങ്ങൾ വിതരണം ചെയ്തു

ലണ്ടൻ: യുക്മ പ്രവർത്തനഫണ്ടിന്‍റെ ധനശേഖരണാർഥം അലൈഡ് ഫിനാൻസുമായി ചേർന്ന് നടത്തിയ യുഗ്രാൻഡ് ലോട്ടറിയുടെ വിജയികൾക്ക് സമ്മാനങ്ങൾ വിതരണം ചെയ്തു. ഒന്നാം സമ്മാനമായി ഫോക്സ് വാഗണ്‍ പോളോ കാറും പ്രോത്സാഹന സമ്മാനമായി പത്തു സ്വർണ നാണയങ്ങളുമായിരുന്നു ജേതാക്കളെ കാത്തിരുന്നത്.

ശനിയാഴ്ച കവൻട്രിയിലെ വോൾസ് ഗ്രേവ് ക്ലബ് മൈതാനത്തിൽ നടന്ന ചടങ്ങിൽ യുക്മ നാഷണൽ പ്രസിഡന്‍റ് മാമ്മൻ ഫിലിപ്പ് ഒന്നാം സമ്മാനമായ ഫോക്സ് വാഗണ്‍ പോളോ കാർ സിബിക്കും യുഗ്രാൻഡ് ലോട്ടറിയുടെ ചുമതലക്കാരനായ യുക്മ നാഷണൽ കമ്മിറ്റിയംഗം ഡോ. ബിജു പെരിങ്ങാത്തറ സ്വർണ നാണയം ബോബി ജെയിംസിനും കൈമാറി. പ്രോത്സാഹന സമ്മാനങ്ങൾ ജയ് ജേക്കബ്, ജിജി സേവ്യർ, ബോബി ജയിംസ്, ജോബി ജോസഫ്, അഭിലാഷ് ആബേൽ, റാം ലീഡ്സ്, ജോയ് പൗലോസ് വോക്കിംഗ്, സ്റ്റാൻലി, ജോജോ ജോയ്, ഷിബു ലിവർപൂൾ എന്നിവർ കരസ്ഥമാക്കി.

ഏറ്റവും കൂടുതൽ ടിക്കറ്റുകൾ വിറ്റഴിച്ച അസോസിയേഷനും റീജണുമുള്ള പുരസ്കാരം യുക്മ ഫാമിലി മീറ്റിൽ വിതരണം ചെയ്യുമെന്ന് നാഷണൽ സെക്രട്ടറി റോജിമോൻ വർഗീസ് അറിയിച്ചു.

യുഗ്രാൻഡ് ലോട്ടറിയുടെ 25 ശതമാനം വിഹിതം അസോസിയേഷനുകൾക്കും 25 ശതമാനം വിഹിതം റീജണുകൾക്കും 10 ശതമാനം തുക യുക്മ ചാരിറ്റിക്കുമായി വിനിയോഗിക്കുമെന്ന് യുക്മ നാഷണൽ ട്രഷറർ അലക്സ് വർഗീസ് അറിയിച്ചു.

യുക്മ ജോയിന്‍റ് ട്രഷറർ ജയകുമാർ നായർ, അലൈഡ് ഫിനാൻസ് മാനേജിംഗ് ഡയറക്ടർ ജോയ് തോമസ്, യുക്മ മിഡ്ലാൻഡ്സ് റീജണ്‍ വൈസ് പ്രസിഡന്‍റ് ജോർജ് മാത്യു, യുക്മ മിഡ്ലാൻഡ്സ് റീജണ്‍ ജോയിന്‍റ് ട്രഷറർ ഷിജു ജോസ് തുടങ്ങിയവർ ചടങ്ങിൽ പങ്കെടുത്തു.