മുക്കം: കാരശേരി പഞ്ചായത്തിന്റെ മൂന്നാം വാർഷികവും വയോജനങ്ങൾക്കായി ആരംഭിച്ച ലെജൻഡ്സ് ക്ലബ്ബും നാളെ രാവിലെ 9.30 ന് നെല്ലിക്കാപറമ്പിൽ തദ്ദേശ സ്വയംഭരണ വകുപ്പ് മന്ത്രി എ.സി. മൊയ്തീൻ ഉദ്ഘാടനം ചെയ്യുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. വയോജന ക്ഷേമ പദ്ധതി പ്രകാരമുള്ള പകൽവീട്, വ്യായാമ പരിശീലന കേന്ദ്രം, യോഗ പരിശീലന കേന്ദ്രം എന്നിവ ഉൾക്കൊള്ളുന്നതാണ് ലെജൻഡ്സ് ക്ലബ്ബ്. വയോജനങ്ങൾക്ക് ഗ്രാമപഞ്ചായത്ത് നൽകുന്ന കട്ടിലിന്റെ ഉദ്ഘാടനവും ഗ്രാമ പഞ്ചായത്ത് പദ്ധതിയിൽ ഉൾപ്പെടുത്തി പരിശീലനം പൂർത്തിയാക്കിയ വനിത ശിങ്കാരിമേള സംഘത്തിന്റെ ഉദ്ഘാടനവും ചടങ്ങിൽ നടക്കും. ജോർജ് എം. തോമസ് എംഎൽഎ അധ്യക്ഷനാകും. ജില്ലാ പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ മുക്കം മുഹമ്മദ്, കൊടിയത്തൂർ ഗ്രാമപഞ്ചായത്ത് പ്രസിഡന്റ് സി.ടി.സി. അബ്ദുല്ല, ടി. വിശ്വനാഥൻ, വി.പി. ജമീല സംബന്ധിക്കും. വാർത്താ സമ്മേളനത്തിൽ കാരശേരി ഗ്രാമ പഞ്ചായത്ത് പ്രസിഡന്റ് വി.കെ. വിനോദ്, അബ്ദുല്ല കുമാരനെല്ലൂർ, സജി തോമസ്, മെഡിക്കൽ ഓഫിസർ ഡോ. മനു ലാൽ, കെ. ആലിഹസൻ പങ്കെടുത്തു.