മഡ്ഗാവ്: ഇന്ത്യൻ സൂപ്പർ ലീഗ് ഫുട്ബോൾ 2022-23 സീസണ് ഫൈനൽ ഇന്ന്. മുൻ ചാന്പ്യന്മാരായ എടികെ മോഹൻ ബഗാനും ബംഗളൂരു എഫ്സിയും തമ്മിലാണു കിരീട പോരാട്ടം. ഇന്നു രാത്രി 7.30ന് ഫത്തോർഡയിലെ ജവഹർലാൽ നെഹ്റു സ്റ്റേഡിയത്തിലാണു കിക്കോഫ്.
2023 കലണ്ടർ വർഷത്തിൽ കളിച്ച 11 മത്സരങ്ങളിൽ 10 ജയം നേടിയാണ് ബംഗളൂരു എഫ്സി ഫൈനലിൽ എത്തിയിരിക്കുന്നത്. ലീഗ് വിന്നേഴ്സ് ഷീൽഡ് ജേതാക്കളായ മുംബൈ സിറ്റി എഫ്സിയുമായി നടന്ന രണ്ടാംപാദ സെമിയിൽ മാത്രമാണു ബംഗളൂരു പരാജയപ്പെട്ടത്. സെമിയിൽ ഇരുപാദങ്ങളിലുമായി 2-2 സമനിലയായതോടെ ഷൂട്ടൗട്ടിലൂടെ 9-8ന്റെ ജയം നേടിയായിരുന്നു ബംഗളൂരുവിന്റെ ഫൈനൽ പ്രവേശം.
2018-19 ചന്പ്യന്മാരായ ബംഗളൂരു രണ്ടാം ഐഎസ്എൽ കിരീടത്തിനായാണു ബൂട്ടണിയുന്നത്.
എടികെയും മോഹൻ ബഗാനും ലയിച്ച് എടികെ മോഹൻ ബഗാൻ ആയശേഷമുള്ള ആദ്യ കിരീടത്തിനായാണു കോൽക്കത്തൻ സംഘം ഇറങ്ങുന്നത്.
2020-21 സീസണിലും എടികെ മോഹൻ ബഗാൻ ഫൈനലിൽ പ്രവേശിച്ചിരുന്നു. എന്നാൽ, അന്ന് മുംബൈ സിറ്റിക്കുമുന്നിൽ പരാജയപ്പെട്ടു. ഇതു രണ്ടാം തവണയാണ് എടികെ മോഹൻ ബഹാൻ ഫൈനലിലെത്തുന്നത്. എടികെ (2014, 2016, 2019-20) മൂന്ന് തവണ ഐഎസ്എൽ ചാന്പ്യൻ പട്ടം കരസ്ഥമാക്കിയിട്ടുണ്ട്.
ബഗാൻ x ബംഗളൂരു ഐഎസ്എൽ ഫൈനൽ ഇന്ന്
01:33 AM Mar 18, 2023 | Deepika.com