മാഡ്രിഡ്: യുവേഫ ചാന്പ്യൻസ് ലീഗ് ഫുട്ബോളിൽ തുടർച്ചയായ മൂന്നാം തവണയും ഇംഗ്ലീഷ് ക്ലബ് ലിവർപൂളിനെ നോക്കൗട്ടിൽ കീഴടക്കി സ്പാനിഷ് കരുത്തരായ റയൽ മാഡ്രിഡ്.
2022-23 സീസണ് പ്രീക്വാർട്ടർ രണ്ടാം പാദത്തിൽ 1-0നു ജയിച്ച റയൽ മാഡ്രിഡ് ഇരുപാദങ്ങളിലുമായി 6-2ന്റെ ആധികാരിക ജയത്തോടെ ക്വാർട്ടറിൽ പ്രവേശിച്ചു. ചാന്പ്യൻസ് ലീഗ് ചരിത്രത്തിൽ ഇരുപാദങ്ങളിലുമായി ലിവർപൂളിന്റെ ഏറ്റവും ദയനീയ തോൽവിയാണിത്.
റയലിന്റെ തട്ടകത്തിൽ നടന്ന രണ്ടാം പാദത്തിൽ കരിം ബെൻസെമ (78’) ആയിരുന്നു ഗോൾ നേടിയത്. 2020-21 സീസണിൽ ക്വാർട്ടറിലും 2021-22 സീസണിൽ ഫൈനലിലും റയൽ മാഡ്രിഡിനു മുന്നിൽ ലിവർപൂൾ തോൽവി വഴങ്ങിയിരുന്നു.
യുവേഫ ചാന്പ്യൻസ് ലീഗ് ചരിത്രത്തിൽ ഒരു ടീം തുടർച്ചയായ മൂന്ന് സീസണ് നോക്കൗട്ടിൽ ഒരേ ക്ലബ്ബിനെ പുറത്താക്കുന്നത് ഇതു രണ്ടാം തവണ. ചാന്പ്യൻസ് ലീഗിൽ റയൽ മാഡ്രിഡിന്റെ 19-ാം ക്വാർട്ടർ പ്രവേശനമാണ്.
ഹാട്രിക് റയൽ
12:13 AM Mar 17, 2023 | Deepika.com