മുംബൈ: ടെസ്റ്റ് ക്രിക്കറ്റ് പോരാട്ടത്തിന്റെ ചൂടാറി, ഇനി ഏകദിന ഏറ്റുമുട്ടലിന്റെ ദിനങ്ങൾ. ഇന്ത്യ x ഓസ്ട്രേലിയ മൂന്നു മത്സര ഏകദിന ക്രിക്കറ്റ് പരന്പര വെള്ളി മുതൽ. മുംബൈ വാങ്കഡെ സ്റ്റേഡിയത്തിൽ വെള്ളിയാഴ്ച നടക്കുന്ന ആദ്യമത്സരത്തിൽ ഇന്ത്യൻ ടീമിനൊപ്പം ക്യാപ്റ്റൻ രോഹിത് ശർമ ഉണ്ടാകില്ല.
രോഹിത്തിന്റെ അഭാവത്തിൽ ഹാർദിക് പാണ്ഡ്യ ആയിരിക്കും ഇന്ത്യയെ നയിക്കുക. കുടുംബാവശ്യത്തിനായി രോഹിത് മാറിനിൽക്കുന്നതിനാലാണ് ആദ്യ ഏകദിനത്തിൽ ഇല്ലാത്തത്. 19ന് വിശാഖപട്ടണത്തു നടക്കുന്ന രണ്ടാം ഏകദിനത്തിനു മുന്പായി രോഹിത് ടീം ഇന്ത്യക്കൊപ്പം ചേരും.
സഞ്ജു വരില്ല
ഓസ്ട്രേലിയയ്ക്കെതിരായ ഏകദിന പരന്പരയ്ക്കുള്ള 18 അംഗ ഇന്ത്യൻ ടീമിൽ ഉൾപ്പെട്ട ശ്രേയസ് അയ്യർ പരിക്കേറ്റു പുറത്തായതോടെ പകരം സഞ്ജു വി. സാംസണ് വരുമെന്ന ആരാധകരുടെ പ്രതീക്ഷ അസ്ഥാനത്ത്.
ശ്രേയസ് അയ്യറിനു പകരം മറ്റൊരു താരത്തെ ടീമിൽ എടുക്കേണ്ടതില്ല എന്ന തീരുമാനമാണു ബിസിസിഐ സെലക്ഷൻ കമ്മിറ്റി സ്വീകരിച്ചത്. ഓസ്ട്രേലിയയ്ക്കെതിരായ നാലാം ടെസ്റ്റിന്റെ മൂന്നാംദിനം നടുവിനു പരിക്കേറ്റ ശ്രേയസ് അയ്യർ പിന്നീട് മൈതാനത്തെത്തിയില്ല.
നടുവിന്റെ പ്രശ്നത്തെത്തുടർന്ന് ശ്രീലങ്കയ്ക്കെതിരായ ഏകദിന പരന്പരയും ഓസ്ട്രേലിയയ്ക്കെതിരായ ആദ്യടെസ്റ്റും ശ്രേയസ് അയ്യറിനു നഷ്ടപ്പെട്ടിരുന്നു. ഐപിഎൽ 2023ലെ ചില മത്സരങ്ങളും ശ്രേയസിനു നഷ്ടപ്പെടുമെന്നാണു റിപ്പോർട്ട്.
ആദ്യ ഏകദിനത്തിൽ രോഹിത് ഇല്ല; ഹാർദിക് പാണ്ഡ്യ നയിക്കും
12:25 AM Mar 15, 2023 | Deepika.com