ഖത്തർ ലോകകപ്പിൽനിന്നു പുറത്തായ ടീമുകളിലെ സൂപ്പർ താരങ്ങൾ അവധിയാഘോഷം തുടങ്ങി. ക്ലബ് ഫുട്ബോളിന്റെ തിരക്കിലേക്കു കടക്കുന്നതിനു മുന്പു തല അൽപം തണുപ്പിക്കാനായി കളിക്കാർ ഉല്ലാസകേന്ദ്രങ്ങൾ ലക്ഷ്യമാക്കി നീങ്ങിയിരിക്കുകയാണ്. ഖത്തർ ലോകകപ്പിൽനിന്ന് പുറത്തായതിനു പിന്നാലെ ടീമുകൾ സ്വദേശങ്ങളിലേക്ക് മടങ്ങിയിരുന്നു.
സ്പാനിഷ് ലാ ലിഗ ഈമാസം 29നും ഇംഗ്ലീഷ് പ്രീമിയർ ലീഗ് 26നും ഫ്രഞ്ച് ലീഗ് വണ്‍ 28നും ഇറ്റാലിയൻ സെരി എ ജനുവരി നാലിനും ജർമൻ ബുണ്ടസ് ലിഗ ജനുവരി 21നുമാണ് പുനരാരംഭിക്കുക.
ലാ ലിഗ ക്ലബ്ബായ ബാഴ്സലോണയുടെ പോളിഷ് സ്ട്രൈക്കർ റോബർട്ട് ലെവൻഡോവ്സ്കി സകുടുംബം മാലദ്വീപിൽ ആണിപ്പോൾ. ലോകകപ്പ് പ്രീക്വാർട്ടറിൽ ഫ്രാൻസിനോട് 3-1നു പരാജയപ്പെട്ട് പോളണ്ട് പുറത്തായിരുന്നു. പോളണ്ടിൽ ലെവൻഡോവ്സ്കിയുടെ സഹതാരമായ ക്രെസ്യാസ്ടോഫ് പിയാടെക്കും ഭാര്യയും മാലദ്വീപിലുണ്ട്. ലാ ലിഗ ക്ലബ്ബായ റയൽ മാഡ്രിഡിന്‍റെ ബെൽജിയം ഗോൾ കീപ്പർ തിബൊ കോർട്വയും മാലദ്വീപിലുണ്ട്.
ഇംഗ്ലീഷ് പ്രീമിയർ ലീഗ് ക്ലബ്ബായ ചെൽസിയുടെ താരവും ഖത്തർ ലോകകപ്പിൽ യുഎസ്എയുടെ വിംഗറുമായ ക്രിസ്റ്റ്യൻ പുലിസിച്ച് ബാസ്കറ്റ്ബോൾ ആസ്വാദനത്തിലാണ്. ഫ്ളോറിഡയിൽ എത്തിയ പുലിസിച്ച് മയാമി ഹീറ്റിന്‍റെ മത്സരം കാണാൻ എത്തിയിരുന്നു. പ്രീക്വാർട്ടറിൽ നെതർലൻഡ്സിനോട് 3-1ന് പരാജയപ്പെട്ട് യുഎസ്എ ലോകകപ്പിൽനിന്ന് പുറത്തായിരുന്നു. പുലിസിച്ചിനൊപ്പം യുഎസ്എ മിഡ്ഫീൽഡർ വെസ്റ്റണ്‍ മക്‌കെയ്നും എൻബിഎയ്ക്ക് എത്തിയിരുന്നു.
പുറത്തായ താരങ്ങൾ അവധി ആഘോഷത്തിൽ
02:29 AM Dec 10, 2022 | Deepika.com