ദോഹ: ഖത്തർ ലോകകപ്പ് ഫുട്ബോളിൽ പ്രീക്വാർട്ടർ ഉറപ്പിക്കുന്ന ആദ്യ ടീം എന്ന നേട്ടം നിലവിലെ ചാന്പ്യന്മാരായ ഫ്രാൻസിന്. ദ ബ്ലൂസ് (ലെസ് ബ്ലൂസ്) എന്നറിയപ്പെടുന്ന ഫ്രാൻസ് ഗ്രൂപ്പ് ഡിയിൽ രണ്ടാം ജയത്തോടെയാണ് നോക്കൗട്ട് ഉറപ്പിച്ചത്.
സൂപ്പർ താരം കൈലിയൻ എംബാപ്പെയുടെ (61’, 86’) ഇരട്ട ഗോൾ ബലത്തിൽ ഫ്രാൻസ് 2-1നു ഡെന്മാർക്കിനെ തോൽപ്പിച്ചു. ആദ്യ രണ്ട് മത്സരത്തിലും ജയം നേടുന്ന ആദ്യടീമുമായി ഫ്രാൻസ്. ഫ്രാൻസിനായി അവസാനം കളിച്ച 12 മത്സരങ്ങളിലായി എംബാപ്പെയുടെ ഗോൾനേട്ടം ഇതോടെ 14 ആയി.
ഗോള്വഴി...
കൈലിയൻ എംബാപ്പെ (61’, 86’)
കൈലിയൻ എംബാപ്പെയും തിയൊ ഹെർണാണ്ടസും നടത്തിയ മുന്നേറ്റം. എംബാപ്പെ പന്ത് ഹെർണാണ്ടസിനു മറിച്ചു. ബോക്സിനുള്ളിൽ എത്തിയ ഹെർണാണ്ടസിന്റെ ബാക്ക് പാസ്. എംബാപ്പെയുടെ വലംകാൽ ഷോട്ട് വലയിൽ.
86-ാം മിനിറ്റിൽ എംബാപ്പെയുടെ രണ്ടാം ഗോൾ. ആൻത്വാൻ ഗ്രീസ്മാന്റെ ക്രോസിൽ ക്ലോസ് റേഞ്ചിൽ എംബാപ്പെ തൊടുത്ത ഷോട്ട് വലയുടെ ഇടത് താഴേത്തട്ടിൽ.
ആന്ദ്രേസ് ക്രിസ്റ്റെൻസണ് (68’)
ക്രിസ്റ്റ്യൻ എറിക്സണിന്റെ കോർണർ. പന്ത് ജോക്കിം ആൻഡേഴ്സണിന്റെ വരുതിയിൽ. ആൻഡേഴ്സണ് മറിച്ച പന്തിനു തലവച്ച ആന്ദ്രേസ് ക്രിസ്റ്റെൻസണിനു പിഴച്ചില്ല. പന്ത് വലയിൽ തുള്ളിക്കളിച്ചു. ഡെന്മാർക്കിന്റെ ആദ്യ ഗോൾ.
ഫ്രാൻസ് പ്രീക്വാർട്ടറിൽ
01:36 AM Nov 27, 2022 | Deepika.com