മുംബൈ: അയർലൻഡ് പര്യടനത്തിനുള്ള ഇന്ത്യയുടെ രണ്ടാം ടീം ഇംഗ്ലണ്ടിലും ട്വന്റി20 കളിച്ചേക്കും. അയർലൻഡിനെതിരായ രണ്ടു മത്സരങ്ങൾക്കുശേഷം ഇംഗ്ലണ്ടിനെതിരേ നടക്കുന്ന മൂന്നു ട്വന്റി20 മത്സരങ്ങൾക്കും ഈ ടീമിനെത്തന്നെ നിയോഗിച്ചേക്കുമെന്നാണു ബിസിസിഐ വൃത്തങ്ങൾ നൽകുന്ന സൂചന. ഓൾറൗണ്ടർ ഹാർദിക് പാണ്ഡ്യയാണു ടീമിന്റെ നായകൻ.
ട്വന്റി20 ലോകകപ്പിലേക്കു മികച്ച ടീമിനെ വാർത്തെടുക്കാനാണു പുതിയ നീക്കത്തിലൂടെ ബിസിസിഐ ലക്ഷ്യമിടുന്നത്. അടുത്ത മാസം ഏഴിനാണ് ഇംഗ്ലണ്ടിനെതിരായ ട്വന്റി20 പരന്പരയിലെ ആദ്യമത്സരം. എന്നാൽ ഒന്നുമുതൽ അഞ്ചുവരെ ഇന്ത്യ ഇംഗ്ലണ്ടിനെതിരേ ടെസ്റ്റ് കളിക്കുന്നുണ്ട്.
ടെസ്റ്റ് കളിച്ച ടീമിനു രണ്ടു ദിവസത്തിനുള്ളിൽ ട്വന്റി20യുമായി പരിചയപ്പെടാൻ പ്രയാസമാകും. ഇതു കണക്കിലെടുത്ത്, ടെസ്റ്റ് കളിച്ച താരങ്ങൾക്കു വിശ്രമം നൽകും. ഒപ്പം, അയർലൻഡിൽ കളിച്ച താരങ്ങൾക്ക് അവസരം നൽകി ട്വന്റി20 ലോകകപ്പിനു ടീമിനെ ഒരുക്കുകയും ചെയ്യാം.
ഇക്കഴിഞ്ഞ ഐപിഎൽ സീസണിലെ തിളക്കമാർന്ന പ്രകടനത്തിലൂടെ, മൂന്നു വർഷത്തിനു ശേഷം ഇന്ത്യൻ ടീമിൽ തിരിച്ചെത്തിയ ദിനേശ് കാർത്തിക് അയർലൻഡ് പര്യടനത്തിലുണ്ട്. ട്വന്റി20 ലോകകപ്പിന് മുൻപ് ദിനേശ് കാർത്തിക്കിനു പരമാവധി അവസരം നൽകാനാണു സെലക്ടർമാരുടെ തീരുമാനം.
മുഖ്യ പരിശീലകൻ രാഹുൽ ദ്രാവിഡിന്റെ പൂർണ പിന്തുണ കാർത്തിക്കിനുണ്ട്. കാർത്തിക്കിന്റെ കാര്യത്തിൽ ടീം മാനേജ്മെന്റ് പ്രത്യേകം ശ്രദ്ധ ചെലുത്തുന്നുണ്ട്. ഈ മാസം 26, 28 തീയതികളിലാണ് അയർലൻഡിനെതിരായ ഇന്ത്യയുടെ മത്സരങ്ങൾ. ഡബ്ലിനാണു വേദി. കെ.എല്. രാഹുൽ, ഋഷഭ് പന്ത്, ശ്രേയസ് അയ്യർ എന്നിവർക്കു വിശ്രമം അനുവദിച്ച പരന്പരയിൽ ഭുവനേശ്വർ കുമാറാണു വൈസ് ക്യാപ്റ്റൻ.
സീനിയർ താരങ്ങളുടെ അഭാവത്തിൽ സൂര്യകുമാർ യാദവ്, സഞ്ജു സാംസണ്, രാഹുൽ ത്രിപാഠി എന്നിവർ ടീമിൽ ഇടം നേടി. ദക്ഷിണാഫ്രിക്കയ്ക്കെതിരായ പരന്പരയിൽ ഇടംനേടാതെ പോയ സഞ്ജുവിന് ട്വന്റി20 ലോകകപ്പ് ടീമിലെത്താനുള്ള അവസാന അവസരമാണ് ഈ പരന്പര.
ഇംഗ്ലണ്ടിനെതിരേ രോഹിത് ശർമയുടെ നേതൃത്വത്തിലുള്ള ടീം ടെസ്റ്റ് നടക്കുന്ന സമയത്തു രണ്ടു പരിശീലന ട്വന്റി20 മത്സരങ്ങളിൽ ഇന്ത്യ കളിക്കുന്നുണ്ട്.
ജൂലൈ ഒന്നിനു നടക്കുന്ന മത്സരത്തിൽ ഡെർബിഷെറും മൂന്നിനു നോർതാംപ്ടണ്ഷയറുമാണ് ഇന്ത്യയുടെ എതിരാളികൾ. അയർലൻഡിൽ ട്വന്റി20 പരന്പര പൂർത്തിയാക്കുന്ന ഹാർദിക്കും കൂട്ടരും ഈ മത്സരങ്ങൾ കളിക്കും.
ഇംഗ്ലണ്ട് പര്യടനത്തിനുള്ള ഇന്ത്യൻ ടീമിനെ ബിസിസിഐ ഇതുവരെ പ്രഖ്യാപിച്ചിട്ടില്ല. ടെസ്റ്റും ട്വന്റി20യും കൂടാതെ മൂന്ന് ഏകദിനങ്ങളും ഇന്ത്യ ഇംഗ്ലണ്ടിൽ കളിക്കുന്നുണ്ട്.
ബി ടീമിന് ഇംഗ്ലീഷ് ക്ലാസ്
12:04 AM Jun 22, 2022 | Deepika.com