ന്യൂഡൽഹി: പ്രധാനമന്ത്രി നരേന്ദ്ര മോദി അമേരിക്കൻ പ്രസിഡന്റ് ജോ ബൈഡനുമായി 24ന് ടോക്കിയോയിൽ ഉഭയകക്ഷി ചർച്ച നടത്തും. ജപ്പാനിലെ ടോക്കിയോയിൽ നടക്കുന്ന ക്വാഡ് (ഇന്ത്യ, അമേരിക്ക, ഓസ്ട്രേലിയ, ജപ്പാൻ രാജ്യങ്ങളുടെ കൂട്ടായ്മ) ഉച്ചകോടിക്കിടെയാവും ബൈഡനുമായി മോദിയുടെ സുപ്രധാന കൂടിക്കാഴ്ച. ജപ്പാൻ പ്രധാനമന്ത്രി കൗണ്ടർ ഫുമിയോ കിഷിദയുമായും മോദി പ്രത്യേക ചർച്ച നടത്തും.
റഷ്യ- യുക്രെയ്ൻ യുദ്ധവും കിഴക്കൻ ലഡാക്കിലെ പാംഗോംഗ് തടാകത്തിൽ ചൈനയുടെ പാലം നിർമാണവും തുടരുന്നതിനിടെയാണു സുപ്രധാന കൂടിക്കാഴ്ചകൾ. ബൈഡനുമായി കഴിഞ്ഞ മാസം മോദി വീഡിയോ കോണ്ഫറൻസിലൂടെ നടത്തിയ ചർച്ചയുടെ തുടർച്ചയാകും ജപ്പാനിൽ നടത്തുക. ഇന്ത്യ- പസഫിക് മേഖലയിലെ സുരക്ഷയാകും സമ്മേളനത്തിലെ ഒരു പ്രധാന ചർച്ചാവിഷയം. ജപ്പാനിലെ ഇന്ത്യൻ സമൂഹവുമായും വ്യവസായപ്രമുഖരുമായും മോദി കൂടിക്കാഴ്ച നടത്തും.