ക്വലാംലംപുർ: 2023 എഎഫ്സി ഏഷ്യൻ കപ്പ് ഫുട്ബോളിന് ചൈന വേദിയാകില്ല. രാജ്യത്ത് കോവിഡ്-19 രോഗികളുടെ എണ്ണം ഉയരുന്ന സാഹചര്യത്തിലാണ് ഏഷ്യൻ കപ്പിന്റെ ആതിഥേയത്വത്തിൽനിന്ന് ചൈനയുടെ പിന്മാറ്റം. ഇക്കാര്യം ചൈനീസ് അസോസിയേഷൻ ഏഷ്യൻ ഫുട്ബോൾ കോണ്ഫെഡറേഷനെ ഒൗദ്യോഗികമായി അറിയിച്ചു.
2019 ജൂണിൽ പാരീസിൽ ചേർന്ന എഎഫ്സി എക്സ്ട്രോഡിനറി കോണ്ഗ്രസിലാണ് 2023ലെ എഎഫ്സി ഏഷ്യൻ കപ്പിന്റെ ആതിഥേയരായി ചൈനയെ പ്രഖ്യാപിച്ചത്. 24 രാജ്യങ്ങൾ പങ്കെടുക്കുന്ന ടൂർണമെന്റ് ചൈനയിലെ പത്ത് നഗരങ്ങളിലായി ജൂണ് 16 മുതൽ ജൂലൈ 16 വരെ നടത്താനാണ് നിശ്ചയിച്ചിരുന്നത്.
2023 ഏഷ്യൻ കപ്പിന്റെ യോഗ്യതയ്ക്കായുള്ള ഗ്രൂപ്പ് ഡിയിൽ കോൽക്കത്തയിൽ നടക്കുന്ന അവസാന റൗണ്ട് മത്സരങ്ങളിൽ ഇന്ത്യൻ ടീം ഇറങ്ങുന്നുണ്ട്. ഹോങ്കോംഗ്, അഫ്ഗാനിസ്ഥാൻ, കംബോഡിയ ടീമുകളാണ് ഇന്ത്യക്കൊപ്പമുള്ളത്.
ഏഷ്യൻ കപ്പിനു ചൈന വേദിയാകില്ല
01:26 AM May 15, 2022 | Deepika.com