തേഞ്ഞിപ്പലം: ദക്ഷിണേന്ത്യന് ജൂണിയർ അത്ലറ്റിക് മീറ്റിന്റെ രണ്ടാം ദിനം റിക്കാർഡുകളുടെ പെരുമഴ. കേരളത്തിന്റെ അപർണ റോയ്, ആൻസി സോജൻ, കെസിയ മറിയം ബെന്നി എന്നിവരുടേതടക്കം 11 മീറ്റ് റിക്കാര്ഡുകൾ ഇന്നലെ പിറന്നു.
അണ്ടര്- 20 വനിത 100 മീറ്റര് ഹര്ഡില്സില് കേരളത്തിന്റെ അപര്ണ റോയ് (14.14 സെക്കൻഡ്), അണ്ടര്- 20 വനിത ലോംഗ് ജംപില് കേരളത്തിന്റെ ഇ. ആന്സി സോജന് (6.28 മീറ്റർ), അണ്ടര്- 20 വനിതകളുടെ ഹാമര് ത്രോയില് കേരളത്തിന്റെ കെസിയ മറിയം ബെന്നി (49 മീറ്റർ) എന്നിവർ റിക്കാർഡ് ബുക്കിൽ കേരളത്തിന്റെ പ്രതിനിധികളായി.
അണ്ടർ-14 പെണ്കുട്ടികളുടെ ലോംഗ് ജംപില് എസ്. സൈന, അണ്ടർ-16 ആണ്കുട്ടികളുടെ ഡിസ്കസ് ത്രോയില് കെ.സി. ശരവണ്, അണ്ടർ -18 ആണ്കുട്ടികളുടെ 110 മീറ്റര് ഹര്ഡില്സില് വി. മുഹമ്മദ് ഹന്നാന് വെള്ളച്ചാലില്, അണ്ടർ-20 ആണ്കുട്ടികളുടെ പോള്വാള്ട്ടില് കെ. അതുല് രാജ് എന്നിവർ ഇന്നലെ കേരളത്തിനു സ്വർണം സമ്മാനിച്ചു.
കോവിഡ് കാലമായതിനാല് വേണ്ടത്ര പരിശീലനം ലഭിച്ചില്ലെങ്കിലും ദേശീയ മീറ്റിലും റിക്കാര്ഡിട്ട് കെസിയ മറിയം ബെന്നിയുടെ മിന്നും പ്രകടനം. അണ്ടർ- 20 ഹാമര് ത്രോയില് 49 മീറ്റർ ദൂരം കുറിച്ച് തമിഴ്നാടിന്റെ ജി. ശുഭ 2000ത്തില് ഹൈദരാബാദില് കുറിച്ച 47.92 മീറ്ററിന്റെ റിക്കാര്ഡ് തിരുത്തുകയായിരുന്നു. എംഎ കോളജില് ഒന്നാം വര്ഷ ബികോം വിദ്യാര്ഥിയാണ്. പി .ഐ. ബാബുവാണ് പരിശീലകന്.
ഹർഡിൽസിൽ ഇരട്ടമെഡൽ
അണ്ടര്- 20 വനിത 100 മീറ്റര് ഹര്ഡില്സില് കേരളത്തിനായി നേട്ടം കൊയ്ത് അപര്ണ റോയിയും ആന് റോസ് ടോമിയും.
കൂടരഞ്ഞി സ്വദേശിയും തിരുവനന്തപുരം മാര് ഈവാനിയോസ് കോളജിലെ ബികോം വിദ്യാര്ഥിനിയുമായ അപര്ണ റോയ് 100 മീറ്റര് ഹര്ഡില്സില് 14.14 സെക്കൻഡില് ഫിനിഷ് ചെയ്ത് പുതിയ റിക്കാര്ഡിട്ടു. 2017ല് തമിഴ്നാടിന്റെ ആര്. നിത്യ 14.33 സമയത്തില് കുറിച്ച റിക്കാര്ഡാണ് അപര്ണ റോയ് മറികടന്നത്. നാട്ടിക സ്പോര്ട്സ് അക്കാഡമിയിലെ താരവും തൃശൂര് സെന്റ് തോമസ് കോളജിലെ ഒന്നാം വര്ഷ ബികോം വിദ്യാര്ഥിനിയുമായ ആന് റോസ് ടോമിക്കാണ് വെള്ളി.
മീറ്റിൽ തമിഴ്നാടാണ് മുന്നിൽ. 24 സ്വര്ണം, 29 വെള്ളി, 21 വെങ്കലം. കേരളം തൊട്ടുപിറകിൽ. 17 സ്വര്ണം, 28 വെള്ളി, 22 വെങ്കലം. കർണാടക മൂന്നാമത്. 14 സ്വര്ണം, എട്ട് വെള്ളി, 10 വെങ്കലം.
ദക്ഷിണേന്ത്യന് ജൂണിയർ മീറ്റ് : റിക്കാർഡ് ദിനം
12:10 AM Feb 28, 2021 | Deepika.com