ബ്രിസ്ബെയ്ന്: ഡേവിഡ് വാര്ണറും സ്റ്റീവ് സ്മിത്തും പുറത്താകാതെ നേടി അര്ധ സെഞ്ചുറികളുടെ മികവില് ഓസ്ട്രേലിയ രണ്ടാം ട്വന്റി20യില് ശ്രീലങ്കയെ തോല്പ്പിച്ചു. ഒമ്പത് വിക്കറ്റിനാണ് ഓസ്ട്രേലിയയുടെ ജയം. മൂന്നു മത്സരങ്ങളുടെ പരമ്പരയില് 2-0ന് ഓസ്ട്രേലിയ നേടി. 118 റണ്സ് വിജയലക്ഷ്യവുമായി ഇറങ്ങിയ ഓസ്ട്രേലിയ 42 പന്ത് ശേഷിക്കെ ലക്ഷ്യത്തിലെത്തി. 13 ഓവറില് ഓസ്ട്രേലിയ ലക്ഷ്യത്തിലെത്തി.
ഒരു റണ് ചേര്ത്തപ്പോഴേക്കും റണ്ണൊന്നുമെടുക്കാതെ ക്യാപ്റ്റന് ആരോണ് ഫിഞ്ചിനെ ഓസീസിന് നഷ്ടപ്പെട്ടു. എന്നാല് രണ്ടാം വിക്കറ്റില് പുറത്താകാതെ 117 റണ്സിന്റെ കൂട്ടുകെട്ടുണ്ടാക്കി സ്റ്റീവ് സ്മിത്തും ഡേവിഡ് വാര്ണറും ഓസീസിനെ വിജയതീരത്തെത്തിച്ചു. വാര്ണര് 41 പന്തില് ഒമ്പത് ഫോറിന്റെ സഹായത്തോടെ 60 റണ്സെടുത്തപ്പോള് 36 പന്തില് ആറു ഫോറുകളുടെ അകമ്പടിയില് 53 റണ്സായിരുന്നു സ്മിത്തിന്റെ സമ്പാദ്യം. വാര്ണറാണ് മാന് ഓഫ് ദ മാച്ച്.
നേരത്തെ 117 റണ്സിന് ശ്രീലങ്ക ഓള് ഔട്ടാകുകയായിരുന്നു. 19 ഓവറിനുള്ളില് എല്ലാ വിക്കറ്റും നിലംപൊത്തി. രണ്ട് വീതം വിക്കറ്റ് വീഴ്ത്തിയ ബില്ലി സ്റ്റാന്ലെയ്ക്ക്, പാറ്റ് കമ്മിന്സ്, ആഷ്റ്റണ് അഗര്, ആദം സാംബ എന്നിവരുടെ ബൗളിംഗിന് മുന്നില് ലങ്കന് ബാറ്റ്സ്മാന്മാര് തകരുകയായിരുന്നു. 27 റണ്സെടുത്ത കുശാല് പെരേരയാണ് ടോപ്പ് സ്കോറര്.
ഓസീസിനു പരമ്പര
11:06 PM Oct 30, 2019 | Deepika.com