ബംഗളൂരു: ബംഗളൂരു എഫ്സി അക്കാഡമി സ്ട്രൈക്കര് ശ്രീധര്ത് നോംഗ്മീകാപം പരിശീലനത്തിനും ട്രയലിനുമായി സ്ലൊവേനിയയിലേക്ക്. സ്ലൊവേനിയന് ക്ലബ് എന്ഡി ലിറിയ 1911 ആണ് ശ്രീധര്തിനെ ക്ഷണിച്ചത്.
ലുബിയാന ആസ്ഥാനമായി സ്ഥിതി ചെയ്യുന്ന ക്ലബ്ബ് രാജ്യത്തെ ഏറ്റവും പഴക്കമുള്ള ക്ലബ്ബാണ്. നിലവില് സ്ലോവേനിയന് മൂന്നാം ലീഗിലാണ് എന്ഡി ലിറിയ കളിക്കുന്നത്. രാജ്യത്തെ കൂടുതല് നേട്ടങ്ങള് കൈവരിച്ച ക്ലബ്ബുകളിലൊന്നായ എന്കെ ഒളിമ്പിയ ലുബിയാനയ്ക്കു മികച്ച കളിക്കാരെ സംഭാവന ചെയ്യുന്ന ക്ലബ്ബാണ് ലിറിയ.
കഴിഞ്ഞ മൂന്നാഴ്ചയായി ബംഗളൂരുവില് പരിശീലനം നടത്തുന്ന ശ്രീധര്ത് വെള്ളിയാഴ്ച സ്ലൊവേനിയയിലെത്തി. കൗമാരതാരം പത്ത് ദിവസം ലുബിയാനയിലുണ്ടാകും. ഈ സമയത്ത് ലിറിയയുടെ അണ്ടര് 15 ടീമിനൊപ്പം പരിശീലനം നടത്തും. ഒന്നാം ഡിവിഷനിലാണ് ലിറിയ അണ്ടര് 15 ടീം കളിക്കുന്നത്. ക്ലബ്ബിന്റെ കോച്ചിംഗ് സ്റ്റാഫിനൊപ്പം ചെലവഴിക്കാനും ശ്രീധര്തിന് അവസരം ലഭിക്കും.
മണിപ്പുരില്നിന്നുള്ള ഈ കൗമാരതാരം സുബ്രതോ കപ്പിലെ പ്രകടനത്തിലൂടെ എഐഎഫ്എഫ് എലൈറ്റ് അക്കാഡമിയിലെത്തിയിരുന്നു. 2020 എഎഫ്സി അണ്ടര് 16 ചാമ്പ്യന്ഷിപ്പ് ഫൈനല് റൗണ്ടിനു യോഗ്യത ലഭിച്ച ഇന്ത്യന് ടീമിനൊപ്പം ശ്രീധര്ത് മികച്ച പ്രകടനം നടത്തിയിരുന്നു.
ബംഗളൂരു എഫ്സി അക്കാഡമി താരത്തിന് സ്ലൊവേനിയയില് ട്രയല്
11:04 PM Oct 26, 2019 | Deepika.com