ബെല്‍ഗ്രേഡ്/ലണ്ടന്‍: യൂറോപ്പ ലീഗ് ഫുട്‌ബോളില്‍ ഇംഗ്ലീഷ് ക്ലബ്ബുകളായ മാഞ്ചസ്റ്റര്‍ യുണൈറ്റഡിനും ആഴ്‌സണലിനും ജയം. ഗ്രൂപ്പ് എലില്‍ യുണൈറ്റഡ് 1-0ന് പാര്‍ട്ടിസന്‍ ബെല്‍ഗ്രേഡിനെ തോല്‍പ്പിച്ചു. 43-ാം മിനിറ്റില്‍ ആന്‍റണ്‍ മാര്‍ഷല്‍ പെനല്‍റ്റി വലയിലാക്കിയാണ് യുണൈറ്റഡിന്‍റെ ജയം നേടിയത്. ജയത്തോടെ യുണൈറ്റഡ് ഏഴു പോയിന്‍റുമായി ഗ്രൂപ്പില്‍ ഒന്നാം സ്ഥാനത്തെത്തി. വിവിധ മത്സരങ്ങളിലായി 12 കളികള്‍ക്കുശേഷം എവേയില്‍ യുണൈറ്റഡിന്‍റെ ആദ്യ ജയമാണ്. കൂടാതെ ഓഗസ്റ്റിനുശേഷം എവേയില്‍ യുണൈറ്റഡിന്‍റെ ആദ്യ ഗോളുമാണ്.
പിന്നില്‍നിന്ന ആഴ്‌സണല്‍ 3-2ന് ഗ്യുമാറീസിനെ തോല്‍പ്പിച്ചു. രണ്ടാം പകുതിയുടെ അവസാന മിനിറ്റുകളില്‍ നിക്കോളസ് പെപെയുടെ രണ്ടു ഫ്രീകിക്ക് ഗോളുകളാണ് ആഴ്‌സണലിനു സ്വന്തം ഗ്രൗണ്ടില്‍ ജയമൊരുക്കിയത്. ഗ്രൂപ്പ് എഫില്‍ മൂന്നു കളിയില്‍ ഒമ്പത് പോയിന്‍റുമായി ആഴ്‌സണലാണ് മുന്നില്‍. പോര്‍ച്ചുഗീസ് ക്ലബ്ബിനെ എട്ടാം മിനിറ്റില്‍ മാര്‍കസ് എഡ്വേഡ്‌സ് മുന്നിലെത്തിച്ചു. 32-ാം മിനിറ്റില്‍ ഗബ്രിയേല്‍ മാര്‍ട്ടിനെല്ലി ആഴ്‌സണലിനു സമനില നല്കി. എന്നാല്‍ ആദ്യ പകുതി തീരുംമുമ്പ് ഗ്യുമാറീസ് വീണ്ടും മുന്നിലെത്തി. ബ്രൂണോ ഡ്യൂര്‍ട്ടാണ് ഗോള്‍ നേടിയത്.
തോല്‍വി ഉറപ്പിച്ചു നീങ്ങിയ ആഴ്‌സണലിനു രക്ഷകനായി പെപെയെത്തി. 80-ാം മിനിറ്റിലെ ഫ്രീകിക്ക് വലയില്‍ തറച്ചിറങ്ങി. അഞ്ചു മിനിറ്റ് മുമ്പാണ് പകരക്കാരനായി പെപെ കളത്തിലിറങ്ങിയത്. ഇഞ്ചുറി ടൈമിന്‍റെ രണ്ടാം മിനിറ്റില്‍ അടുത്ത ഫ്രീകിക്കും വലയിലാക്കി പെപെ ആഴ്‌സണലിനു വിജയം സമ്മാനിച്ചു.
മറ്റൊരു ഇംഗ്ലീഷ് ക്ലബ് വൂള്‍വര്‍ഹാംടണ്‍ വാണ്ടറേഴ്‌സ് 2-1ന് സ്ലോവന്‍ ബ്രാട്ടിസ്ലാവയെ തോല്‍പ്പിച്ചു. സെവിയ്യ, എഫ്‌സി ബേസല്‍, എസ്പാനിയോള്‍, സെല്‍റ്റിക് ടീമുകള്‍ ജയിച്ചു. എഎസ് റോമ, വൂള്‍ഫ്‌സ്ബര്‍ഗ്, പോര്‍ട്ടോ ടീമുകള്‍ക്ക് സമനിലകൊണ്ടു തൃപ്തിപ്പെടേണ്ടിവന്നു.
യുണൈറ്റഡിനും ആഴ്‌സണലിനും ജയം
12:20 AM Oct 26, 2019 | Deepika.com