മലപ്പുറം: ഡൽഹിയിൽ നടക്കുന്ന സുബ്രതോ കപ്പ് അണ്ടർ-17 ദേശീയ സ്കൂൾ ഫുട്ബോൾ ടൂർണമെന്റിൽ മലപ്പുറം ചേലേന്പ്ര നാരായണൻ നായർ മെമ്മോറിയൽ എച്ച്എസ്എസ് (എൻഎൻഎംഎച്ച്എസ്എസ്) സെമിയിൽ. ഇന്നലെ നടന്ന ക്വാർട്ടറിൽ കരുത്തരായ മുംബൈ റിലയൻസ് ഫൗണ്ടേഷൻ സ്കൂളിനെ (2-0) കീഴടക്കിയാണ് കേരളത്തെ പ്രതിനിധീകരിക്കുന്ന ചേലേന്പ്ര സ്കൂൾ സെമിയിൽ പ്രവേശിച്ചത്.
കളിയിലുടനീളം മേധാവിത്വം പ്രകടിപ്പിച്ച ചേലേന്പ്ര ടീമിന്റെ നായകൻ ബാവുനിഷാദ് ആണ് 33ാം മിനിറ്റിൽ മനോഹരമായ ഗോളിലൂടെ ടീമിനെ മുന്നിലെത്തിച്ചത്. 54ാം മിനിറ്റിൽ അക്ഷയ് മണിയെ ഫൗൾ ചെയ്തതിനു ലഭിച്ച ഫ്രീകിക്ക് അക്ഷയ് തന്നെ ഗോളാക്കി മാറ്റുകയായിരുന്നു. തിരിച്ചടിക്കാൻ റിലയൻസ് കിണഞ്ഞു ശ്രമിച്ചിട്ടും ചേലേന്പ്രയുടെ പ്രതിരോധം വഴങ്ങിയില്ല. മുന്പ് രണ്ടുതവണ മലപ്പുറത്തെ എംഎസ്പി സ്കൂൾ സുബ്രതോ ഫൈനലിൽ കളിച്ചിരുന്നുവെങ്കിലും കിരീടം നേടാനായില്ല.
ജേതാക്കൾക്കു ട്രോഫിക്കു പുറമെ 3,50,000 രൂപയാണ് സമ്മാനത്തുക. റണ്ണേഴ്സ് അപ്പിനു രണ്ടു ലക്ഷവും. സെമി ഫൈനൽ- 75,000, ക്വാർട്ടർ- 50,000 രൂപ എന്നിങ്ങനെയും ലഭിക്കും. ആദ്യ റൗണ്ടിൽ നാലു മത്സരങ്ങളിലും വിജയിച്ചു ഗ്രൂപ്പ് ജേതാക്കളായാണു ക്വാർട്ടറിൽ റിലയൻസിനെ നേരിട്ടത്. മുഖ്യപരിശീലകൻ മൻസൂർ അലി, ടീം മാനേജർ ഇസ്മായിൽ, അധ്യാപകരായ മുഹമ്മദ്, ഫസലുൽ ഹക്, ബൈജീവ് എന്നിവർ ടീമിനൊപ്പമുണ്ട്.
സുബ്രതോ കപ്പ്: ചേലേന്പ്ര സ്കൂൾ സെമിയിൽ
11:56 PM Nov 15, 2018 | Deepika.com