അബുദാബി: ഓപ്പണിംഗ് ബാറ്റ്സ്മാനായ ഇമാം ഉൾ ഹഖിന്റെ പരിക്കും ആശങ്കകളും വാർത്തകളിൽനിറഞ്ഞ മത്സരത്തിൽ പാക്കിസ്ഥാൻ ആറ് വിക്കറ്റിന് ന്യൂസിലൻഡിനെ കീഴടക്കി. ലോക്കീ ഫെർഗുസന്റെ പന്ത് ഹെൽമറ്റിന്റെ ഗ്രിഡിൽകൊണ്ട് ഇമാം നിലത്ത് വീണു. 16 റണ്സ് എടുത്തുനിൽക്കുന്പോഴായിരുന്നു സംഭവം. സിടി സ്കാൻ പരിശോധനകളിൽ പരിക്ക് ഗുരുതരമല്ലെന്നു വ്യക്തമായതായി പാക് ക്രിക്കറ്റ് ബോർഡ് അറിയിച്ചു.
ടോസ് നേടി ക്രീസിലെത്തിയ ന്യൂസിലൻഡിന് 50 ഓവറിൽ ഒന്പത് വിക്കറ്റ് നഷ്ടത്തിൽ 209 റണ്സ് എടുക്കാനേ സാധിച്ചുള്ളൂ. 86 റണ്സ് എടുത്ത് പുറത്താകാതെനിന്ന റോസ് ടെയ്ലറാണ് ടീമിനെ 200 കടത്തിയത്. 38 റണ്സ് വഴങ്ങി നാല് വിക്കറ്റ് വീഴ്ത്തിയ ഷഹീൻ ഷാ അഫ്രീദിയാണ് കിവികളെ പൂട്ടിയത്. ഫഖാർ സമാൻ (88 റണ്സ്), ബാബർ അസം (46 റണ്സ്), മുഹമ്മദ് ഹഫീസ് (27 നോട്ടൗട്ട്) തുടങ്ങിയവരുടെ പ്രകടനത്തിലൂടെ പാക്കിസ്ഥാൻ നാല് വിക്കറ്റ് നഷ്ടത്തിൽ 40.3 ഓവറിൽ ജയം നേടി. മൂന്ന് മത്സര പരന്പര ഇതോടെ 1-1 സമനിലയിലായി. അവസാന മത്സരം ഇന്ന് നടക്കും.
ഇമാമിന്റെ പരിക്കിനിടെ പാക് ജയം
11:44 PM Nov 10, 2018 | Deepika.com