ന്യൂഡൽഹി: ഏഡൻ കടലിടുക്കിൽവച്ച് ലൈബീരിയൻ കപ്പൽ കൊള്ളയടിക്കാനുള്ള കടൽകൊള്ളക്കാരുടെശ്രമം നാവിക സേന വിഫലമാക്കി. കടൽകൊള്ള തടയാൻ ലക്ഷ്യമിട്ട് ഏഡൻ കടലിടുക്കിൽ നങ്കൂരമിട്ടിരിക്കുന്ന ഐഎൻഎസ് ശാരദയാണ് ഓപ്പറേഷൻ നടത്തിയത്. എംവി ലോഡ് മൗണ്ട്ബാറ്റണിൽനിന്നു സന്ദേശമെത്തിയതിനു പിന്നാലെയാണ് കമാൻഡോകൾ ഹെലികോപ്റ്ററിൽ ആക്രമണം നടത്തിയത്. എട്ട് ചെറു ബോട്ടിലും രണ്ട് മോട്ടോർബോട്ടിലും കൊള്ള സംഘം കപ്പലിനെ സമീപിക്കുന്നതിനിടെയാണ് ഇന്ത്യൻ നേവി ആക്രമണം നടത്തിയത്. കൊള്ളസംഘത്തിന്റെ ബോട്ടിൽനിന്ന് ഒരു ഓട്ടോമാറ്റിക് കാൽഷ്നികോവ് റൈഫിൾ, 28 റൗണ്ട് തിരകൾ തുടങ്ങിയവ കണ്ടെടുത്തതായി നേവി വക്താവ് ക്യാപ്റ്റൻ ഡി.കെ. ശർമ പറഞ്ഞു.