എടൂര്‍ : തലശേരി അതിരൂപത കോര്‍പറേറ്റ് എഡ്യുക്കേഷണല്‍ ഏജന്‍സി ഏര്‍പ്പെടുത്തിയ ഏറ്റവും മികച്ച ഹയര്‍ സെക്കന്‍ഡറി സ്‌കൂളിനുളള എക്‌സലന്‍സ് അവാര്‍ഡ് എടൂര്‍ സെന്‍റ് മേരീസ് ഹയര്‍ സെക്കന്‍ഡറി സ്‌കൂളിന് ലഭിച്ചു. തുടര്‍ച്ചയായി കഴിഞ്ഞ രണ്ടു വര്‍ഷവും ബെസ്റ്റ്‌സ്‌കൂള്‍ അവാര്‍ഡ് ഈ സ്ഥാപനമാണ് കരസ്ഥമാക്കിയത്. 2016-17 അധ്യയന വര്‍ഷത്തെ മികച്ച പ്രവര്‍ത്തനങ്ങളെ അടിസ്ഥാനമാക്കിയാണ് ഈ വര്‍ഷം അവാര്‍ഡ് നല്കിയിട്ടുളളത്. ജില്ലയില്‍ ഏറ്റവും കൂടുതല്‍ വിദ്യാര്‍ഥികളെ പരീക്ഷയ്ക്കിരുത്തുകയും ഏറ്റവും കൂടുതല്‍ ഫുള്‍ എ പ്‌ളസുകളും ഏറ്റവും മികച്ച വിജയ ശതമാനവും നേടി. സംസ്ഥാന സ്‌കൂള്‍ കലോത്സവത്തില്‍ നാടകം, ഇംഗ്ലീഷ് സ്‌കിറ്റ്, ഭരതനാട്യം , നാടോടി നൃത്തം, ഹിന്ദി പ്രസംഗം,സംസ്‌കൃത പ്രഭാഷണം, ഐടി ക്വിസ് എന്നീ ഇനങ്ങളില്‍ സംസ്ഥാനത്ത് തിളക്കമാര്‍ന്ന വിജയവും എ ഗ്രേഡുകളും ഈ സ്ഥാപനത്തിലെ വിദ്യാര്‍ഥികള്‍ കരസ്ഥ മാക്കി. സബ്ജില്ലാ കായിക മേളയില്‍ ഓവറോള്‍ കിരീടവും ജില്ലയില്‍ നാലാം സ്ഥാനവും ലഭിച്ചു. കലാമേളയില്‍ ജില്ലയില്‍ നാലാം സ്ഥാനവും സംസ്ഥാനത്ത് ഇരുപത്തേഴാം സ്ഥാനത്ത് എത്തുകയും ചെയ്തു. ഐ ടി മേളയിലും പ്രവര്‍ത്തി പരിചയ മേളയിലും ഓവറോള്‍ കിരീടവും ശാസ്ത്രമേളയില്‍ രണ്ടാം സ്ഥാനവും നേടിയെടുത്തു. ആര്‍. നന്ദകുമാര്‍ എന്ന വിദ്യാര്‍ഥി സംസ്ഥാന കലാപ്രതിഭയായി. 2016 ലെ പ്ലസ്ടു പരീക്ഷയില്‍ ഏറ്റവും ഉയര്‍ന്ന മാര്‍ക്ക് നേടിയ പത്ത് വിദ്യാര്‍ഥികള്‍ക്ക് ഇന്‍സ്‌പയര്‍ സ്‌കോളര്‍ഷിപ്പും ലഭിച്ചു. ഇന്ത്യയില്‍ ആകെയുളള രണ്ടു ശതമാനം വിദ്യാര്‍ഥികള്‍ക്ക് മാത്രമാണ് ഈ സ്‌കോളര്‍ഷിപ്പിന് അര്‍ഹതയുളളത്. 80000 രൂപയാണ് ഒരു വര്‍ഷം ഒരു വിദ്യാര്‍ഥിക്ക് സ്‌കോളര്‍ഷിപ്പ് തുകയായി ലഭിക്കുന്നത്. ജില്ലയില്‍ തന്നെ ഈ വിദ്യാലയത്തിലെ കുട്ടികള്‍ നേടുന്ന ഈ വിജയം സ്‌കൂളിന് മാത്രം അവകാശപ്പെടാവുന്നതാണ്. മെഡിക്കല്‍ എന്‍ജിനിയറിംഗ് എന്‍ട്രന്‍സ് പരീക്ഷയില്‍ മികച്ച റാങ്കുകളും നേടിക്കൊണ്ടിരിക്കുന്നു. ഈ നേട്ടങ്ങളുടെയെല്ലാം പിന്നില്‍ മികച്ച അച്ചടക്കവും മികച്ച അധ്യാപനവും ആണെന്ന് സ്‌കൂള്‍ മാനേജര്‍ ഫാ. ആന്‍റണി മുതുകുന്നേല്‍ പറഞ്ഞു. തലശേരി അതിരൂപതാ മെത്രാപ്പോലീത്ത മാര്‍ ജോര്‍ജ് ഞരളക്കാട്ടില്‍ നിന്നുമാണ് സ്‌കൂള്‍ പ്രിന്‍സിപ്പൽ എം .ടി . ജെയിംസ് ഈ അവാര്‍ഡ് ഏറ്റുവാങ്ങിയത്.
സ്‌കൂള്‍ മാനേജര്‍ ഫാ. ആന്‍റണി മുതുകുന്നേല്‍, അസി. മാനേജര്‍ ഫാ. സോജന്‍ ഇളംപുരയിടം, പിടിഎ പ്രസിഡന്‍റ് സി.എം. ജോര്‍ജ്, മദര്‍ പിടിഎ പ്രസിഡന്‍റ് സാവിത്രി പ്രകാശ്, പിടിഎ എക്‌സിക്യുട്ടീവംഗങ്ങളായ സുബി, കെ.ടി തോമസ് എന്നിവര്‍ അധ്യാപകരേയും വിദ്യാര്‍ഥികളേയും അനുമോദിച്ചു.
സ്‌കൂള്‍ മാനേജര്‍ ഫാ. ആന്‍റണി മുതുകുന്നേല്‍, അസി. മാനേജര്‍ ഫാ. സോജന്‍ ഇളംപുരയിടം, പിടിഎ പ്രസിഡന്‍റ് സി.എം. ജോര്‍ജ്, മദര്‍ പിടിഎ പ്രസിഡന്‍റ് സാവിത്രി പ്രകാശ്, പിടിഎ എക്‌സിക്യുട്ടീവംഗങ്ങളായ സുബി, കെ.ടി തോമസ് എന്നിവര്‍ അധ്യാപകരേയും വിദ്യാര്‍ഥികളേയും അനുമോദിച്ചു.
