അഗളി: അട്ടപ്പാടിയിൽ കാട്ടാനയുടെ ആക്രമണത്തിൽ ആദിവാസി വയോധികൻ കൊല്ലപ്പെട്ടു. കോട്ടമല ഉൗരിലെ പീലാണ്ടി (65) ആണ് മരിച്ചത്. നെല്ലിപ്പതി ഫോറസ്റ്റ് ചെക്പോസ്റ്റിനു മൂന്നൂറു മീറ്റർ മാറി തോട്ടാപ്പുരയ്ക്കടുത്തു തിങ്കളാഴ്ച്ച രാത്രി പത്തോടെയാണ് സംഭവം. അയൽവാസി ശാന്തകുമാരിയുടെ വീട് കാട്ടാന തകർക്കുന്നതു കണ്ട് ഓടിയെത്തിയതായിരുന്നു പീലാണ്ടി. വീട്ടിലേക്കെത്തുന്നതിനു മുന്പു കാട്ടാനയുടെ മുന്നിൽ അകപ്പെടുകയായിരുന്നു. കൊലപ്പെടുത്തിയ ശേഷം കാട്ടാന മൂന്നുമണിക്കൂറോളം മൃതദേഹത്തിനടുത്തു നിന്ന ശേഷമാണ് മടങ്ങിയത്. ഭാര്യ: മുരുകി. മക്കൾ: രങ്കി, കാളി, പാപ്പ, മുരുകൻ. മരുമക്കൾ: മുരുകൻ, കുപ്പൻ, മരുതൻ.
