കോഴിക്കോട്: നക്സൽ നേതാവായിരുന്ന വർഗീസിന്റെ 48-ാം രക്തസാക്ഷി ദിനം ആചരിച്ചു. വർഗീസ് അനുസ്മരണ സമിതിയുടെ ആഭിമുഖ്യത്തിൽ പൊറ്റമ്മലിൽ നടന്ന സമ്മേളനം എഴുത്തുകാരി രതീദേവി ഉദ്ഘാടനം ചെയ്തു. വർഗീസ് യുവത്വത്തിന്റെ പ്രതീകമാണെന്ന് അവർ പറഞ്ഞു. ഇന്നത്തെ സാഹചര്യത്തിൽ ജീവിക്കാനും ഭരണകൂട ഭീകരതയെ ചെറുക്കാനും വർഗീസ് പുനർജനിക്കേണ്ടത് ആവശ്യമാണെന്നും രതീദേവി പറഞ്ഞു. എ.എസ്. നാരായണപിള്ള അധ്യക്ഷത വഹിച്ചു. സി.കെ. അബ്ദുറഹിമാൻ, പ്രഫ. പി. കോയ, കെ.എസ്. ഹരിഹരൻ, പി. അംബിക, മുസ്തഫ കൊമ്മേരി, ഒ.കെ. ശ്രീനിവാസൻ തുടങ്ങിയവർ പ്രസംഗിച്ചു. വ്യാജ ഏറ്റുമുട്ടലിലെ രാഷ്ട്രീയം എന്ന വിഷയത്തിൽ സെമിനാറും നടന്നു.