ഗ്രേറ്റ് ബ്രിട്ടൻ സീറോ മലബാർ രൂപത വാൽസിംഗ്ഹാം തീർഥാടനം ജൂലൈ 17 ന്; ഒരുക്കങ്ങൾ പൂർത്തിയായി

പ്രസ്റ്റൻ: ഗ്രേറ്റ് ബ്രിട്ടൻ സീറോ മലബാർ രൂപത ജൂലൈ പതിനേഴിന് നടത്തുന്ന ഈ വർഷത്തെ വാൽസിംഗ്ഹാം തീർഥാടനത്തിന്‍റെ ഒരുക്കങ്ങൾ പൂർത്തിയായി . കഴിഞ്ഞുപോയ വർഷങ്ങളിൽ വളരെ ആഘോഷപൂർവ്വം കൂടുതൽ വിശ്വാസ സമൂഹത്തെ സാക്ഷിയാക്കി നടത്തിയിരുന്ന രൂപത തീർത്ഥാടനം കോവിഡ് മാനദണ്ഡങ്ങൾ നിലനിൽക്കുന്ന പ്രത്യേക സാഹചര്യങ്ങളാൽ 300 പേരെ മാത്രം പങ്കെടുപ്പിച്ചാണ് ഈ വർഷം സംഘടിപ്പിച്ചിരിക്കുന്നത്.

രൂപതയുടെ എല്ലാ ഇടവക / മിഷനുകളിൽ ഒരാഴ്ചയായി പ്രത്യേകമായി തീർത്ഥാടന ദിവസത്തിനായി പ്രാർത്ഥിച്ചൊരുങ്ങുകയാണ്. ഉച്ചക്ക് ഒന്നരയ്ക്ക് ജപമാലയോടെ ആരംഭിക്കുന്ന ശുശ്രൂഷകളിൽ തുടർന്ന് രൂപതാധ്യക്ഷൻ മാർ ജോസഫ് സ്രാമ്പിക്കൽ വിശുദ്ധ കുർബാന അർപ്പിക്കും. രൂപതയിലെ മറ്റു വൈദികർ സഹകാർമ്മികരാകും. തുടർന്ന് ആഘോഷമായ പ്രദക്ഷിണം , ദിവ്യകാരുണ്യ ആരാധന എന്നിവയും നടക്കും . തീർഥാടനത്തിൽ ഭവനങ്ങളിലിരുന്ന് പങ്കെടുക്കുന്നവർക്കായി രൂപതയുടെ യുട്യൂബ്, ഫേസ്ബുക്ക് പേജ് വഴിയും ഓൺലൈൻ പ്ലാറ്റ്‌ഫോമുകളിൽ കൂടിയും പങ്കെടുക്കുവാനുള്ള സൗകര്യം ഉണ്ടായിരിക്കും.

തീർഥാനത്തിൽ പങ്കെടുക്കുവാൻ മുൻകൂട്ടി പേരുകൾ നൽകിയവർക്ക് ഇതുവരേയും പാസുകൾ ലഭിച്ചിട്ടില്ലെങ്കിൽ ഉടനെ തന്നെ തീർഥാടന കമ്മറ്റിയുമായി ബന്ധപ്പെടേണ്ടതാണ് . ഈ വർഷത്തെ തീർത്ഥാടനത്തിന്‍റെ എല്ലാ ഒരുക്കങ്ങൾക്കും നേതൃത്വം കൊടുക്കുന്നത് തോമസ് പാറക്കണ്ടത്തിലച്ചന്‍റെ നേതൃത്വത്തിൽ ഉള്ള ഹേവർഹിൽ സമൂഹമാണ്. ഈ കോവിഡ് കാലത്ത് രൂപതയിൽ ഒരു കുടുംബമായി എല്ലാവരും ഒന്ന് ചേർന്ന് പരിശുദ്ധ ആമ്മയുടെ മാധ്യസ്ഥ്യം യാചിച്ചുകൊണ്ടു തീർഥാടനം ഒരു ആത്മീയ അനുഭവമായ്ക്കുവാൻ ഏവരെയും പ്രഥനാപൂർവം ക്ഷണിക്കുന്നതായി തീർത്ഥാടന കോർഡിനേറ്റർ മോൺ .ഫാ. ജിനോ അരിക്കാട്ട് എംസിബിഎസ് അറിയിച്ചു.

റിപ്പോർട്ട് : ഷൈമോൻ തോട്ടുങ്കൽ