കൂരാച്ചുണ്ട്: പഞ്ചായത്ത് പതിനൊന്നാം വാർഡ് നമ്പികുളം ഇക്കോ ടൂറിസം കേന്ദ്രത്തിലേക്കുള്ള റോഡ് ഗതാഗതയോഗ്യമാക്കാൻ കെ.എം. സച്ചിൻ ദേവ് എംഎൽഎയുടെ പ്രാദേശിക വികസന ഫണ്ടിൽ നിന്നും 25 ലക്ഷം രൂപ അനുവദിച്ചു. ജില്ലയിലെ അറിയപ്പെടുന്ന വിനോദ സഞ്ചാര കേന്ദ്രമായി വികസിക്കാൻ സാധ്യതയുള്ള ഈ കേന്ദ്രത്തിന് കഴിഞ്ഞ സർക്കാർ ഒന്നര കോടി രൂപ അനുവദിച്ചിരുന്നു.എന്നാൽ പ്രവൃത്തി നടക്കുന്ന കേന്ദ്രത്തിലേക്കുള്ള റോഡ് ഭൂരിഭാഗവും ഗതാഗത യോഗ്യമല്ലാത്ത അവസ്ഥയിലായിരുന്നു. അടുത്ത മാസത്തോടെ കേന്ദ്രത്തിന്‍റെ ഉദ്ഘാടനം നടത്തുന്നതിനായി നിലവിൽ പ്രവൃത്തി പുരോഗമിച്ചുവരികയാണ്. റോഡിന്‍റെ ശോച്യാവസ്ഥ സംബന്ധിച്ച് പ്രദേശവാസികൾ സിപിഎമ്മിന്‍റെ നേതൃത്വത്തിൽ കെ.എം. സച്ചിൻ ദേവ് എംഎൽഎയ്ക്ക് നിവേദനം നൽകിയതിനെ തുടർന്ന് എംഎൽഎ കളക്‌ട്രേറ്റിൽ യോഗം വിളിച്ചുച്ചേർത്തിരുന്നു. നമ്പികുളം ഇക്കോ ടൂറിസം കേന്ദ്രത്തിലേക്കുള്ള റോഡിന് ഫണ്ട് അനുവദിച്ച എംഎൽഎയെ സിപിഎം കൂരാച്ചുണ്ട് ലോക്കൽ കമ്മിറ്റി അഭിനന്ദിച്ചു. കെ.ജി. അരുൺ, പി.എം. തോമസ്, ജോസ് ചെരിയൻ, കെ.ജെ. തോമസ് എന്നിവർ പ്രസംഗിച്ചു.
