പയ്യന്നൂർ: പയ്യന്നൂർ നഗരത്തിൽ പഴയ കെട്ടിടം തകർന്നു വീണു. സെൻട്രൽ ബസാറിൽ കരിഞ്ചാമുണ്ടി അറയ്ക്ക് എതിർ വശത്തായുള്ള കെട്ടിടമാണ് തകർന്ന് വീണത്. ഇന്നലെ രാവിലെ പതിനൊന്നോടെയാണ് സംഭവം. നഗരത്തിലെ പഴയ കെട്ടിടങ്ങളിലൊന്നായിരുന്നു ഇത്. ചുമട്ടുതൊഴിലാളികൾ വിശ്രമിക്കാനായി ഇതുപയോഗിച്ചിരുന്നു. തൊഴിലാളികൾ സാധനങ്ങൾ ഇറക്കാൻ പോയ സമയത്തായിരുന്നു കെട്ടിടം തകർന്നു വീണത്. ഇതിനാൽ വലിയ അപകടം ഒഴിവായി. നഗരസഭ വൈസ് ചെയർമാൻ പി.വി. കുഞ്ഞപ്പന്റെ നേതൃത്വത്തിൽ നഗരസഭ എൻജിനീയറിംഗ് വിഭാഗം സ്ഥലത്തെത്തി പരിശോധന നടത്തി. അപകടാവസ്ഥയിലുള്ള കെട്ടിടത്തിന്റെ ബാക്കി ഭാഗങ്ങൾ പൊളിച്ച് നീക്കാൻ നോട്ടീസ് നൽകുമെന്ന് അധികൃതർ പറഞ്ഞു.