വിയന്ന: ഓസ്ട്രിയയിൽ ജനിച്ചു വളർന്ന രണ്ടാം തലമുറയിലുള്ള മലയാളി യുവജനങ്ങളുടെ ആദ്യ മുഴുനീള ചലച്ചിത്രം മാർച്ച് 5 വെള്ളിയാഴ്ച റിലീസ് ചെയ്യും. സാബു എന്റെ അനിയൻ എന്ന് പേരിട്ടിരിക്കുന്ന ചിത്രം വ്യത്യസ്ത സഹോദരബന്ധത്തിന്റെ വിവിധ തലങ്ങളും, പ്രണയവും പ്രതികാരവും, പ്രതിസന്ധികളുമൊക്കെ കോർത്തിണക്കി യൂറോപ്യൻ പശ്ച്ചാത്തലത്തിലാണ് അവതരിപ്പിച്ചിരിക്കുന്നത്.
യൂറോപ്പിലെ ഒരു പ്രവാസി കുടുംബത്തിൽ അമ്മയില്ലാതെ വളർന്ന രണ്ടു സഹോദരങ്ങളുടെ ജീവിതവും അവർ കടന്നുപോകുന്ന ജീവിത സാഹചര്യങ്ങളുമൊക്കെയാണ് 132 മിനിറ്റുള്ള സിനിമയുടെ ഇതിവൃത്തം. നൂറിലധികം കലാകാരന്മാർ അണിനിരക്കുന്ന വിവാഹ നൃത്ത രംഗങ്ങളും, പുതുതലമുറയുടെ സ്പന്ദനങ്ങളുമൊക്കെ ചേർത്ത് കുടുംബ സദസുകൾക്കുകൂടി ആസ്വദിക്കാവുന്ന രീതിയിലാണ് ചിത്രം അണിയിച്ചൊരുക്കിയിരിക്കുന്നത്.
നിരവധി ഹ്രസ്വ ചിത്രങ്ങൾ സംവിധാനം ചെയ്തിട്ടുള്ള സിമ്മി കൈലാത്താണ് സിനിമയുടെ രചനയും, തിരക്കഥയും സംവിധാനവും നിർവഹിച്ചിരിക്കുന്നത്. സംഗീതം എബിൻ പള്ളിച്ചൽ. ഛായാഗ്രഹണം പാസ്കൽ കാസെറ്റി. ഓസ്ട്രിയയിലെയും സ്വിറ്റസർലൻഡിലെയും മലയാളി താരങ്ങളും വിദേശകലാക്കാരൻമാരും ഉൾപ്പെടെ വലിയൊരു താരനിര ചിത്രത്തിൽ അണിനിരന്നിട്ടുണ്ട്.
കിരണ് കോതകുഴയ്ക്കൽ, ബ്ലൂയിൻസ് തോമസ്, ശരത് കൊച്ചുപറന്പിൽ, സിൽവിയ കൈലാത്ത്, സിമ്മി കൈലാത്ത്, പ്രസാദ് മുകളേൽ, ടാനിയ എബ്രഹാം തുടങ്ങിയ മലയാളി താരങ്ങളോടൊപ്പം ഓസ്ട്രിയൻ അഭിനേതാക്കളായ ഫിലിപ്പ് ഷിമങ്കോ, ഇസബെല്ല, ജ്യോർഗ് സെറ്റില്ലിംഗ്, ബ്രിഗിത്ത് സി. ക്രാമർ എന്നിവരും വേഷമിട്ടിട്ടുണ്ട്.
റിപ്പോർട്ട്: ജോബി ആന്റണി
ഓസ്ട്രിയയിലെ രണ്ടാംതലമുറയിൽ നിന്നുള്ള ആദ്യത്തെ മലയാളസിനിമ വെള്ളിയാഴ്ച റിലീസ് ചെയ്യും
10:46 PM Mar 03, 2021 | Deepika.com