കുമ്പള: അംഗടിമുഗര് ഗവ. ഹയര്സെക്കന്ഡറി സ്കൂളിലെ പ്ലസ് വണ് വിദ്യാര്ഥിയെ രണ്ടാംവര്ഷ വിദ്യാര്ഥികള് റാഗിംഗിന് വിധേയമാക്കുന്ന വീഡിയോ പ്രചരിച്ചതിനെത്തുടര്ന്ന് വിദ്യാഭ്യാസമന്ത്രി വി.ശിവന്കുട്ടി റിപ്പോര്ട്ട് തേടി. ഹയര് സെക്കന്ഡറി വിഭാഗം കണ്ണൂര് മേഖല ഡപ്യൂട്ടി ഡയറക്ടറോടാണ് റിപ്പോര്ട്ട് ആവശ്യപ്പെട്ടത്. ചൊവ്വാഴ്ച വൈകുന്നേരം സ്കൂള് വിട്ട് നടന്നുപോകുകയായിരുന്ന പതിനാറുകാരനെ പ്ലസ്ടുവിന് പഠിക്കുന്ന ചില വിദ്യാര്ഥികള് ബസ് വെയിറ്റിംഗ് ഷെഡിന് സമീപം തടഞ്ഞുനിര്ത്തുകയും സാങ്കല്പികമായി മോട്ടോര് സൈക്കിള് ഓടിക്കാന് നിര്ബന്ധിക്കുകയും ചെയ്യുന്നതിന്റെയും ഭീഷണിപ്പെടുത്തുന്നതിന്റെയും വീഡിയോയാണ് സമൂഹമാധ്യമങ്ങളില് പ്രചരിച്ചത്. ഇതു സംബന്ധിച്ച് സ്കൂള് അധികൃതരും പിടിഎയും കുമ്പള സിഐക്ക് പരാതി നല്കിയിരുന്നു. അഞ്ച് പ്ലസ് ടു വിദ്യാര്ഥികളാണ് സംഭവത്തില് ഉള്പ്പെട്ടിരുന്നത്. ഇവരെ പോലീസ് സ്റ്റേഷനിലേക്ക് വിളിപ്പിച്ച് ചോദ്യം ചെയ്തശേഷം വിട്ടയച്ചു.രേഖാമൂലം പരാതി നല്കിയാല് കേസെടുക്കാമെന്നാണ് പോലീസിന്റെ നിലപാട്.