മട്ടന്നൂർ: കണ്ണൂർ വിമാനത്താവളത്തിൽ വൻ സ്വർണവേട്ട. 83 ലക്ഷത്തിന്റെ സ്വർണവുമായി കോഴിക്കോട് സ്വദേശി പിടിയിൽ. കോഴിക്കോട് കൂരാച്ചുണ്ട് സ്വദേശി മുഹമ്മദ് സാബിറിൽ നിന്നാണ് 1634 ഗ്രാം സ്വർണം പിടികൂടിയത്. ഞായറാഴ്ച വൈകുന്നേരം വിമാനത്താവളത്തിലെ എയർ ഇന്റലിജൻസ് യൂണിറ്റിലെ എയർ കസ്റ്റംസിലെ ഉദ്യോഗസ്ഥരും ഡിആർഐ ഉദ്യോഗസ്ഥരും ചേർന്ന് നടത്തിയ പരിശോധനയിലാണ് സ്വർണം പിടികൂടിയത്. മസ്കറ്റിൽ നിന്ന് കണ്ണൂരിലേക്ക് വന്ന ഗോ എയർ വിമാനത്തിലെ യാത്രക്കാരനായിരുന്നു മുഹമ്മദ് സാബിർ. ചെക്കിംഗ് പരിശോധനയിലാണ് സ്വർണം കണ്ടെത്തിയത്. 14 സ്വർണ പ്ലേറ്റുകളായി എമർജൻസി ലാമ്പിൽ ഒളിപ്പിച്ച നിലയിലായിരുന്നു സ്വർണം. യാത്രക്കാരനെ അറസ്റ്റ് ചെയ്തു ചെയ്ത് അന്വേഷണം നടത്തി വരികയാണ്.