ടാലന്‍റ് ഷോ "ലെറ്റസ് ബ്രേക്ക് ഇറ്റ് ടുഗതറി'ൽ കലാപ്രതിഭ ടോണി അലോഷ്യസും സഹോദരി ആനി അലോഷ്യസും

ലണ്ടൻ: യുക്മ സാംസ്കാരിക വേദിയുടെ ആഭിമുഖ്യത്തിൽ, കോവിഡ് 19 നെതിരായ പ്രവർത്തനങ്ങൾക്ക് മുൻനിരയിൽ നിൽക്കുന്ന ലോകം മുഴുവനുമുള്ള ആരോഗ്യ പ്രവർത്തകർക്ക് പിന്തുണയും ആദരവും അർപ്പിച്ച് ലൈവ് ടാലന്‍റ് ഷോ "ലെറ്റസ് ബ്രേക്ക് ഇറ്റ് ടുഗതറി'ൽ ജൂൺ 25 നു (വ്യാഴം) വൈകുന്നേരം 5 ന് (ഇന്ത്യൻ സമയം രാത്രി 9.30) അരങ്ങുണർത്താൻ എത്തുന്നത് സഹോദരങ്ങളായ ആനി അലോഷ്യസും ടോണി അലോഷ്യസുമാണ്. യുക്മ റീജണൽ, നാഷണൽ കലാമേള വേദികളിലെ സ്ഥിരം വിജയികളായ ഈ സഹോദരങ്ങൾ യു കെ മലയാളികൾക്ക് സുപരിചിതരാണ്.

എയിൽസ്ബറി ഗ്രാമർ സ്കൂൾ ഇയർ പന്ത്രണ്ടാം ക്ലാസ് വിദ്യാർഥിനിയായ ആനി അലോഷ്യസ് 2014, 2017 വർഷങ്ങളിൽ യുക്മ ഈസ്റ്റ് ആംഗ്ളിയ റീജൺ കലാതിലകമായിരുന്നു. 2014, 2016, 2017 വർഷങ്ങളിൽ റീജണൽ വ്യക്തിഗത ചാംപ്യനായിരുന്ന ആനി, 2019 ൽ മാഞ്ചസ്റ്റർ ദേശീയ കലാമേളയിൽ മോഹിനിയാട്ടത്തിന് ഒന്നാം സ്ഥാനം നേടി. സോളോ സോംഗ്, പദ്യ പാരായണം, മോഹിനിയാട്ടം, ഭരതനാട്യം, കഥാപ്രസംഗം, സ്റ്റോറി ടെല്ലിംഗ്, മോണോ ആക്ട്, ഒപ്പന, തിരുവാതിര, ഗ്രൂപ്പ് സോംഗ് ഇനങ്ങളിൽ വിവിധ വേദികളിൽ മികവു തെളിയിച്ചിട്ടുള്ള ആനി അക്ഷരാർത്ഥത്തിൽ ഒരു സകല കലാ വല്ലഭയാണ്. ഏഷ്യാനെറ്റ് യൂറോപ്പ് ടാലന്‍റ് കോണ്ടസ്റ്റ്- 2013 റണ്ണർ അപ്, സിംഗ് വിത് സ്റ്റീഫൻ ദേവസി കണ്ടസ്റ്റ് - 2017 റണ്ണർ അപ് തുടങ്ങി നിരവധി സംഗീത മത്സരങളിലും പ്രതിഭ തെളിയിച്ചിട്ടുണ്ട് ഈ കലാകാരി. വേണുഗീതം 2018 ൽ പ്രശസ്ത ഗായകൻ ജി. വേണുഗോപാലിനൊപ്പം പാടാൻ അവസരം ലഭിച്ച ഈ അനുഗ്രഹീത കലാകാരി കർണാട്ടിക് മ്യൂസിക്, ശാസ്ത്രീയ നൃത്തം എന്നിവയിൽ നന്നേ ചെറുപ്പം മുതൽ പരിശീലനം ആരംഭിച്ചു.

2018 ൽ കർണാട്ടിക് മ്യൂസിക് ( വോക്കൽ) അരങ്ങേറ്റം കുറിച്ച ആനി, വെസ്റ്റേൺ മ്യൂസിക് (വോക്കൽ) ഗ്രേഡ് - 8, പിയാനോ ഗ്രേഡ് - 6, ഭരതനാട്യം (ISTD)
ഗ്രേഡ് - 5 എന്നിവ ഇതിനോടകം കരസ്ഥമാക്കി കഴിഞ്ഞു. 2019 ൽ യുക്മ ഔട്ട്സ്റ്റാന്റിംഗ് അച്ചീവ്മെന്റ് അവാർഡ് കരസ്ഥമാക്കിയ ഈ മിടുക്കി, UKMT ഇന്‍റർമീഡിയറ്റ് മാത്‌സ് ഗോൾഡ് മെഡൽ, ഡ്യൂക്ക് ഓഫ് എഡിൻബറോ സിൽവർ മെഡൽ എന്നിവയും നേടിയിട്ടുണ്ട്.

2019 മാഞ്ചസ്റ്റർ ദേശീയ കലാമേളയിലെ കലാപ്രതിഭ പട്ടം നേടിയ ടോണി അലോഷ്യസ് തന്റെ സഹോദരി ആനിയെ പോലെ ഒരു സകല കലാവല്ലഭനാണ്. മാഞ്ചസ്റ്റർ കലാമേളയിൽ ജൂണിയർ വിഭാഗം വ്യക്തിഗത ചാംപ്യനായ ടോണി പങ്കെടുത്ത മൂന്നിനങ്ങളിലും ഒന്നാം സ്ഥാനം നേടിയാണ് കലാപ്രതിഭ പട്ടം ചൂടിയത്.

2018, 2019 വർഷങ്ങളിലെ ഈസ്റ്റ് ആംഗ്ളിയ റീജൺ കലാപ്രതിഭയായ ടോണി, 2019 ൽ നടന്ന റ്റീൻ സ്റ്റാർ ലണ്ടൻ ഏരിയ ഡാൻസ് മത്സരത്തിൽ ഫൈനലിസ്റ്റ് ആയിരുന്നു. എയിൽസ്ബറി ഗ്രാമർ സ്കൂളിലെ ഇയർ 10 വിദ്യാർഥിയായ ടോണി, യുക്മ മാത്‌സ് ചലഞ്ച് 2018 ൽ ഈസ്റ്റ് ആംഗ്ളിയ റീജൺ വിന്നർ, UKMT ജൂണിയർ മാത്‌സ് ഗോൾഡ് മെഡൽ എന്നിവയും നേടിയിട്ടുണ്ട്. നൃത്തം ഹൃദയത്തിലേറ്റി നടക്കുന്ന ടോണി പിയാനോ ഗ്രേഡ് - 5, ഡ്രംസ് ഗ്രേഡ് - 4 എന്നിവയും ഇതിനോടകം നേടി കഴിഞ്ഞു. കരാട്ടേ പരിശീലനം ബ്രൗൺ ബെൽറ്റിലെത്തി നിൽക്കുന്ന ഈ കലാപ്രതിഭ നല്ലൊരു ഫുട്ബോളറും കൂടിയാണ്. ലൂട്ടൻ ബറോ ഡ്രാഗൺസ് ഫുട്ബോൾ ടീമിലെ അംഗമായ ടോണി ഫുട്ബോളിലും തന്റെ കഠിന പരിശീലനം തുടരുകയാണ്.

കല, കായികം, പഠനം എന്നിങ്ങനെ തൊടുന്ന മേഖലകളെല്ലാം പൊന്നാക്കി മാറ്റുന്ന ഈ അപൂർവ്വ സഹോദരങ്ങൾ ഒരുക്കുന്ന രാഗ വിസ്മയത്തിലേക്ക് "LET'S BREAK IT TOGETHER" ന്‍റെ പ്രേക്ഷകരേയും സ്നേഹപൂർവം സംഘാടകർ സ്വാഗതം ചെയ്തു. യുക്മ ഈസ്റ്റ് ആംഗ്ലിയ റീജണിലെ ലൂട്ടൻ കേരളൈറ്റ്സ് അസോസിയേഷൻ അംഗങ്ങളായ അലോഷ്യസ് - ജിജി ദമ്പതികളുടെ മക്കളാണ് ഈ കൗമാര വിസ്മയങ്ങൾ .

കോവിഡ് - 19 രോഗബാധിതർക്കു വേണ്ടി സ്വന്തം ജീവൻപോലും തൃണവൽഗണിച്ച് കരുതലിന്റെ സ്നേഹസ്പർശമായി, വിശ്രമരഹിതരായി യു കെ യിലെ എൻ എച്ച് എസ് ഹോസ്‌പിറ്റലുകളിലും കെയർഹോമുകളിലും ജോലി ചെയ്യുന്ന ആരോഗ്യ പ്രവർത്തകർ ഉൾപ്പെടെ ലോകത്തിലെ മുഴുവൻ ആരോഗ്യ മേഖലകളിലും പ്രവർത്തിക്കുന്നവർക്ക് ആദരവ് അർപ്പിച്ചുകൊണ്ട് യുക്മ സാംസ്കാരിക വേദിയുടെ ആഭിമുഖ്യത്തിൽ സംഘടിപ്പിക്കുന്ന ഈ ലൈവ് ഷോ യുക്മയുടെ ഔദ്യോഗീക ഫേസ്ബുക്ക് പേജ് ആയ UUKMA യിലൂടെയാണ് സംപ്രേക്ഷണം ചെയ്യുന്നത്.

എട്ടു വയസു മുതൽ 21 വയസു വരെ പ്രായമുള്ള യു കെ യിലെ വൈവിധ്യമാർന്ന കലാവാസനയുള്ള പ്രതിഭകളെയും ലോകത്തിന്‍റെ വിവിധ ഭാഗങ്ങളിൽ പ്രശസ്തരായ കുട്ടികളെയും പങ്കെടുപ്പിച്ച് നടത്തുന്ന ഈ കലാവിരുന്ന് ആരോഗ്യ പ്രവർത്തകർക്ക് കൃതജ്ഞതയും അഭിവാദ്യവും അർപ്പിക്കുന്നതിനായാണ് സംഘടിപ്പിച്ചിരിക്കുന്നത്. വ്യത്യസ്തമായ സംഗീതോപകരണങ്ങളിൽ കലാവിരുത് പ്രകടിപ്പിക്കുവാൻ കഴിവുള്ള പ്രതിഭകളുടെ കലാപ്രകടനങ്ങളാണ് ഈ ലൈവ് ഷോയുടെ പ്രധാന ആകർഷണം. എന്നാൽ ഹാസ്യാത്മകമായ പരിപാടികൾ ഉൾപ്പെടെ വൈവിധ്യമാർന്നതും ആകർഷണങ്ങളുമായ മറ്റു കലാപരിപാടികൾ അവതരിപ്പിക്കുവാനുള്ള അവസരവും ഉണ്ടായിരിക്കുന്നതാണ്.

യുകെയിലെ അറിയപ്പെടുന്ന ഗായകനായ റെക്സ് ബാൻഡ് യു കെ യുടെ റെക്സ് ജോസും, ജെ ജെ ഓഡിയോസിന്റെ ജോജോ തോമസും ചേർന്ന് പരിപാടികൾ അവതരിപ്പിക്കുന്നവർക്ക് വേണ്ട സാങ്കേതിക സഹായങ്ങൾ നൽകുന്നതാണ്. കലാപരിപാടികൾ അവതരിപ്പിക്കുന്നതിനുവേണ്ട മിനിമം സമയം 20 മിനിറ്റ് ആണ്. പരിപാടികൾ അവതരിപ്പിക്കുവാൻ ആഗ്രഹിക്കുന്ന എട്ടു മുതൽ 21 വയസു വരെ പ്രായപരിധിയിലുള്ള കലാ പ്രതിഭകൾ അവതരിപ്പിക്കുവാൻ ആഗ്രഹിക്കുന്ന പരിപാടിയുടെ, കുറഞ്ഞത് അഞ്ച് മിനിറ്റ് ദൈർഘ്യം ഉള്ള വീഡിയോ ക്ലിപ്പ് 07846747602 എന്ന് വാട്സ്ആപ്പ് നമ്പറിൽ അയച്ചു തരേണ്ടതാണ് . ഓർഗനൈസിംഗ് കമ്മിറ്റിയുടെ തീരുമാനം അനുസരിച്ച് പരിപാടികൾ അവതരിപ്പിക്കേണ്ടവരെ മുൻകൂട്ടി അറിയിക്കുന്നതുമായിരിക്കും.

വിവരങ്ങൾക്ക് : സി.എ. ജോസഫ് 07846747602 , കുര്യൻ ജോർജ് 07877348602.

റിപ്പോർട്ട്: കുര്യൻ ജോർജ്