മാഡ്രിഡ്: അന്താരാഷ്ട്ര യാത്രകൾക്ക് ഏർപ്പെടുത്തിയിരിക്കുന്ന നിരോധനം സ്പെയ്ൻ ജൂണ് പതിനഞ്ചു വരെ നീട്ടി. അനിവാര്യമായ യാത്രകൾക്കു മാത്രം ഇളവ് ലഭിക്കും.
രാജ്യത്ത് പുതിയതായി എത്തുന്നവർക്ക് ക്വാറന്റൈൻ നേരത്തെ തന്നെ നിർബന്ധമാക്കിയിരുന്നു. കര, കടൽ, ആകാശം എന്നിവ വഴി നിലവിൽ സ്പാനിഷ് പൗരൻമാർക്കോ സ്പാനിഷ് റെസിഡൻസ് പെർമിറ്റ് ഉള്ളവർക്കോ മാത്രമേ ഇപ്പോൾ രാജ്യത്തെത്താൻ അനുവാദമുള്ളൂ.
ദീർഘദൂര ട്രക്കുകൾ ഓടിക്കുന്നവർക്കും ആരോഗ്യ രംഗത്തു പ്രവർത്തിക്കുന്നവർക്കും കെയർ ജീവനക്കാർക്കും നയതന്ത്ര പ്രതിനിധികൾക്കും ജോലിപരമായ യാത്രകൾക്ക് നിയന്ത്രണത്തിൽ ഇളവ് നൽകും.
ടൂറിസം രക്ഷാ പാക്കേജുമായി ഫ്രാൻസ്
പാരീസ്: ഫ്രഞ്ച് സന്പദ് വ്യവസ്ഥയുടെ പ്രധാന കണ്ണികളിലൊന്നായ ടൂറിസം മേഖലയെ സംരക്ഷിക്കാൻ സർക്കാർ പദ്ധതി തയാറാക്കി. പതിനെട്ടു ബില്യൻ യൂറോയാണ് ഇതിനായി നീക്കിവച്ചിരിക്കുന്നത്.
ഏറ്റവും തിരക്കേറിയ ടൂറിസ്റ്റ് സീസണായ വേനലവധിക്കാലം നഷ്ടപ്പെടുത്താതെ മുന്നോട്ടു പോകാനുള്ള ശ്രമത്തിലാണ് സർക്കാരും ടൂറിസം മേഖലയിൽ പ്രവർത്തിക്കുന്ന കന്പനികളും.
അതേസമയം, അന്താരാഷ്ട്ര യാത്രകൾക്കു നിയന്ത്രണം തുടരുന്ന സാഹചര്യത്തിൽ പ്രാദേശിക ടൂറിസം പ്രോത്സാഹിപ്പിക്കുക മാത്രമായിരിക്കും ഇപ്പോൾ മുന്നിലുള്ള വഴി.
റിപ്പോർട്ട്: ജോസ് കുന്പിളുവേലിൽ
സ്പെയ്നിൽ അന്താരാഷ്ട്ര യാത്രാ നിരോധനം ജൂണ് 15 വരെ നീട്ടി
10:23 PM May 16, 2020 | Deepika.com