സംവിധായകനും അവതാരകനും റേഡിയോ ജോക്കിയുമായ മാത്തുക്കുട്ടി വിവാഹിതനായി. പെരുന്പാവൂർ സ്വേദശി ഡോ. എലിസബത്ത് ഷാജി മഠത്തിലാണ് വധു. ഞായറാഴ്ചയായിരുന്നു ഇരുവരുടെയും വിവാഹം. അടുത്ത ബന്ധുക്കളും സുഹൃത്തുക്കളും മാത്രമാണ് വിവാഹത്തിൽ പങ്കെടുത്തത്.
വൈകിട്ട് നടന്ന വിവാഹവിരുന്നിൽ വിനീത് ശ്രീനിവാസനുൾപ്പെടെ നിരവധി സുഹൃത്തുക്കളും പങ്കെടുത്തു. ആർജെ മാത്തുക്കുട്ടിയുടെ പുനർവിവാഹമാണിത്. ചെറുപ്പം മുതൽ അറിയാവുന്ന പെൺകുട്ടിയാണ് എലിസബത്തെന്നും ആ സൗഹൃദം പിന്നീട് പ്രണയത്തിലെത്തുകയായിരുന്നുവെന്നും മാത്തുക്കുട്ടി വിവാഹശേഷം പറഞ്ഞു.
‘‘ഭാര്യയുടെ പേര് എലിസബത്ത് ഷാജി, ഡോക്ടറാണ്. കാനഡയിൽ ജോലി ചെയ്യുന്നു. ഞാൻ കാക്കനാട്, അവൾ കാനഡ... ഞങ്ങൾ അയൽക്കാരാണ്. പ്രണയവിവാഹമെന്ന് പറയാം. സൗഹൃദം പിന്നീട് ദൃഢമാകുകയും അത് പിന്നീട് പ്രണയത്തിലെത്തുകയുമായിരുന്നു.’’മാത്തുക്കുട്ടി പറഞ്ഞു.
അരുണ് മാത്യു എന്നാണ് മാത്തുക്കുട്ടിയുടെ യഥാർഥ പേര്. ചാനല് ഷോകളിലൂടെ അവതാരകനായി തിളങ്ങിയ മാത്തുക്കുട്ടി സിനിമകളിലും അഭിനയിച്ചിട്ടുണ്ട്.
2015ല് രൂപേഷ് പീതാംബരന് സംവിധാനം ചെയ്ത യൂടൂ ബ്രൂട്ടസ് എന്ന ചിത്രത്തില് സംഭാഷണം എഴുതി സിനിമയുടെ അണിയറപ്രവർത്തനങ്ങളിൽ ഭാഗമായി. ശേഷം 2021ല് ആസിഫ് അലിയെ നായകനാക്കി കുഞ്ഞെല്ദോ എന്ന സിനിമ സംവിധാനം ചെയ്തു.