സമൂഹമാധ്യമത്തിൽ വിമർശിച്ചയാൾക്ക് മറുപടി നൽകി നടി സാധിക വേണുഗോപാൽ. പുതിയ ചിത്രത്തിലെ കഥാപാത്രത്തിനായി നടത്തിയ മേക്ക് ഓവർ വീഡിയോ താരം ഇൻസ്റ്റഗ്രാമിൽ പങ്കുവച്ചിരുന്നു.
ഒരു ആദിവാസി പെൺകുട്ടിയുടെ വേഷവിധാനത്തിലുള്ള മേക്കോവറാണ് താരം ചെയ്തത്. എന്നാൽ ഈ വീഡിയോയ്ക്ക് താഴെ നിരവധി കമന്റുകൾ വന്നിരുന്നു.
ഇത്തിരി തൊലി വെളുത്തതാണെന്നുള്ള അഹങ്കാരം ഉണ്ടല്ലേ എന്നായിരുന്നു ഒരു കമന്റ്. ‘‘തൊലി വെളുത്തതാണെന്ന് ചേട്ടന് തോന്നുന്നെങ്കില് ചേട്ടന്റെ കണ്ണിന്റെ നന്മയും സൗന്ദര്യവും ആണ്, നന്ദി.’’ എന്നായിരുന്നു താരം നല്കിയ മറുപടി.
ഈ വീഡിയോ എടുത്ത് മറ്റുള്ളവരെ കാണിക്കുന്നത് വളരെ മോശമാണെന്നും നടിയുടെ ഉദ്ദേശ്യം എന്തെന്ന് മനസിലാകുന്നില്ലെന്നുമായിരുന്നു മറ്റൊരു വിമർശനം.
ഇതിനും സാധിക മറുപടി നൽകി. ‘‘പ്രമോഷന് ആണ് സഹോദരാ, നാട്ടുകാരെ കാണിക്കല് തന്നെ ആണ് ഉദ്ദേശം. താല്പര്യം ഉണ്ടെങ്കില് മാത്രം കണ്ടാല് മതി’’ സാധിക പറഞ്ഞു.
സീരിയൽ സിനിമ രംഗത്ത് ഒരു പോലെ തിളങ്ങി നിൽക്കുന്ന താരമാണ് സാധിക. കലികാലം, എംഎൽഎ മണി പത്താം ക്ലാസും ഗുസ്തിയും, ബ്രേക്കിംഗ് ന്യൂസ് തുടങ്ങിയവയാണ് പ്രധാന സിനിമകൾ.