തൊടുപുഴയിൽ ചിത്രീകരണം നടക്കുന്ന ‘സ്വര്ഗത്തിലെ കട്ടുറുമ്പ്’ എന്ന സിനിമയുടെ ചിത്രീകരണത്തിനിടെ വാഹനമിടിച്ച് ഇലട്രിക് പോസ്റ്റ് ഒടിഞ്ഞു വീണിരുന്നു. നടി ഗൗരിയും നടന്മാരായ ചെമ്പില് അശോകനും ചാലി പാലയും സഞ്ചരിച്ച വാഹനമാണ് നിയന്ത്രണം തെറ്റി റോഡരികിലുള്ള വൈദ്യുതി പോസ്റ്റില് ഇടിച്ചത്.
ആര്ക്കും സാരമായ പരിക്കുകളില്ലെന്ന് നടി ഗൗരി നന്ദ അറിയിച്ചു. സെറ്റില് അപകടം സംഭവിച്ച വിവരം അറിഞ്ഞതോടെ നിരവധിപേർ തന്നെ വിളിച്ചുവെന്നും എല്ലാവരോടും നന്ദിയുണ്ടെന്നും താരം സമൂഹമാധ്യമത്തിൽ പങ്കുവച്ച കുറിപ്പിൽ പറഞ്ഞു.
എല്ലാവർക്കും നമസ്കാരം, കഴിഞ്ഞ ദിവസം ‘സ്വർഗത്തിലെ കട്ടുറുമ്പ്’ സിനിമ ഷൂട്ടിംഗ് ലൊക്കേഷനിൽ വച്ച് ചിത്രീകരണം നടക്കുന്നതിനിടെ ഞാൻ സഞ്ചരിച്ച പൊലീസ് വാഹനം പെട്ടെന്ന് നിയന്ത്രണം വിട്ട് അടുത്തുള്ള വൈദ്യുതി പോസ്റ്റിൽ പോയി ഇടിക്കുകയുണ്ടായി.
അപകടത്തിൽ പോസ്റ്റ് ഒടിഞ്ഞു ലൈൻ പൊട്ടി ഞാൻ ഇരുന്ന സൈഡിൽ താഴെവീണു. ഞാൻ ഫ്രണ്ട് സീറ്റിൽ ഇടതുവശത്തായിരുന്നു ഇരുന്നത്. ഡ്രൈവിംഗ് സീറ്റിൽ ചെമ്പിൽ അശോകൻ ചേട്ടൻ, ചാലിപാലാ ചേട്ടൻ ബാക്ക് സീറ്റിൽ.
പോസിറ്റിൽ ഇടിച്ചു നിന്നത് കൊണ്ട് വലിയ അപകടം ഒഴിവായി കിട്ടി. ആർക്കും അങ്ങനെ കാര്യമായ പരിക്കുകൾ ഒന്നും തന്നെ സംഭവിച്ചില്ല.
വിവരം അറിഞ്ഞു വിളിച്ചവരോടൊക്കെ നന്ദി പറയുന്നു. ഞാൻ പൂർണ സുരക്ഷിതയാണ്, ഏവരുടെയും പ്രാർഥനകൾക്കും പിന്തുണകൾക്കും നന്ദി. ഗൗരി നന്ദ പറഞ്ഞു.
ധ്യാൻ ശ്രീനിവാസനെ നായകനാക്കി ജസ്പാൽ ഷൺമുഖൻ സംവിധാനം ചെയ്യുന്ന ചിത്രമാണ് ‘സ്വർഗത്തിലെ കട്ടുറുമ്പ്’. കെ.എൻ. ശിവൻകുട്ടൻ കഥയെഴുതുന്ന ചിത്രം മൈന ക്രിയേഷൻസ് നിർമിക്കുന്നു. ഗായത്രി അശോകാണ് ചിത്രത്തിലെ നായിക.