മകൾ നന്ദനയുടെ ഓർമയിൽ വിതുന്പി ഗായിക കെ.എസ്. ചിത്ര. അകാലത്തിൽ വേർപെട്ട മകളുടെ ഓർമദിനത്തിൽ വികാരനിർഭരമായ കുറിപ്പാണ് ഗായിക പങ്കുവച്ചത്. മകളില്ലാതെയുള്ള ജീവിതം മുന്നോട്ടു നീങ്ങുകയാണെന്നും മനസ്സു നിറയെ മകളെക്കുറിച്ചുള്ള ഓർമകളാണെന്നും ചിത്ര സമൂഹമാധ്യമങ്ങളിൽ കുറിച്ചു. 
ഞങ്ങളുടെ ഹൃദയം നിറയെ നിന്നെക്കുറിച്ചുള്ള ഓർമകളാണ്. അഭിമാനത്തോടെ ഞങ്ങൾ നിന്നെക്കുറിച്ചു സംസാരിക്കുന്നു. നീയില്ലാതെ ജീവിതം മുന്നോട്ടു നീങ്ങുകയാണ്. അത് ഒരിക്കലും ഒരുപോലെയായിരിക്കില്ല. ഞങ്ങളുടെ പ്രിയപ്പെട്ട നന്ദനമോളെ സ്നേഹത്തോടെ സ്മരിക്കുന്നു. ചിത്ര കുറിച്ചു.
വർഷങ്ങൾ നീണ്ട കാത്തിരിപ്പിനൊടുവിൽ 2002ലാണ് കെ.എസ്.ചിത്രയ്ക്കും ഭർത്താവ് വിജയശങ്കറിനും മകൾ പിറന്നത്. എന്നാൽ ആ സന്തോഷം അധികം നീണ്ടു നിന്നില്ല. 2011ല്‍ ദുബായിലെ വില്ലയിൽ നീന്തൽകുളത്തിൽ വീണ് ഒമ്പത് വയസ്സുകാരിയായ നന്ദന മരണപ്പെടുകയായിരുന്നു.
