റിലീസിനൊരുങ്ങുന്ന ധനുഷ് ചിത്രം വാത്തിയുടെ ഓഡിയോ ലോഞ്ച് ചടങ്ങിൽ ഗായിക ശ്വേത മോഹനൊപ്പം പാട്ട് പാടുന്ന ധനുഷിന്റെ വീഡിയോയാണ് ഇപ്പോൾ വൈറലാകുന്നത്. നൂറുകണക്കിന് പ്രേക്ഷകർക്ക് മുന്നിൽ ലൈവായിട്ടാണ് ധനുഷ് ചിത്രത്തിലെ വാ വാത്തി എന്ന ഗാനം ശ്വേതക്കൊപ്പം ആലപിച്ചത്.
വേദിയിലേക്ക് കടന്നു വന്ന ജി.വി. പ്രകാശ് കുമാറിനും ശ്വേതക്കുമൊപ്പം യാതൊരു മടിയും കൂടാതെ പെട്ടെന്ന് തന്നെ താരം ഗാനം ഏറ്റുപാടി. ജി.വി.പ്രകാശ് കുമാറിന്റെ സംഗീതത്തിൽ ശ്വേത മോഹനാണ് വാത്തിയിൽ ഈ ഗാനം ആലപിച്ചത്.
പ്രണയം തുളുന്പുന്ന ഈ ഗാനം ധനുഷിനൊപ്പം കൂടി കേട്ടപ്പോൾ ആരാധകർക്കും സന്തോഷം. തന്നെ കാണാനായി എത്തിയ എല്ലാവർക്കും നന്ദി പറയാനും താരം മടിച്ചില്ല. അവസാനം നിങ്ങൾക്കായി തരാൻ മറ്റൊന്നുമില്ല എന്നു പറഞ്ഞ് മറ്റൊരു ഗാനവും ധനുഷ് മൂളി.
ധനുഷും നിത്യ മേനോനും പ്രധാന വേഷത്തിലെത്തിയ തിരുച്ചിത്രന്പലം എന്ന ചിത്രത്തിലെ തേൻമൊഴി എന്ന ഗാനമാണ് ആരാധകർക്കായി മൂളിക്കൊടുത്തത്. ഇപ്പോൾ യാതൊരു തയ്യാറെടുപ്പുകളുമില്ലാതെ സാങ്കേതിക സഹായവുമില്ലാതെ ധനുഷ് പാടിയതാണ് ആരാധകർ ഏറ്റെടുത്തിരിക്കുന്നത്.
തമിഴ്നാട്–ആന്ധ്രപ്രദേശ് അതിർത്തി ഗ്രാമത്തിൽ നടക്കുന്ന കഥ പറയുന്ന ‘വാത്തി’യില് മലയാളി താരം സംയുക്ത നായികയായെത്തുന്നു. ഫെബ്രുവരി17നാണ് ചിത്രം തിയറ്ററുകളിലെത്തുന്നത്.