തമിഴ് യുവതാരം അർജുൻ ദാസുമൊന്നിച്ചുള്ള ചിത്രം വൈറലായതോടെ ചിത്രത്തിന് വ്യക്തത വരുത്തി നടി ഐശ്വര്യ ലക്ഷ്മി. കണ്ടപ്പോൾ ഒരു ഫോട്ടോ എടുത്തതാണെന്നും അർജുൻ ദാസ് അദ്ദേഹത്തിന്‍റെ ആരാധകരുടെയായിരിക്കുമെന്നും നടി വ്യക്തമാക്കി. ഇൻസ്റ്റഗ്രാമിലാണ് താരം മറുപടിയുമായെത്തിയത്.
ഞാൻ ഇന്നലെ പോസ്റ്റ് ചെയ്ത ഫോട്ടോ ഇത്രയധികം ചർച്ച‌യാകുമെന്ന് കരുതി‌യില്ല. അദ്ദേഹത്തിനെ കണ്ടു. ഒരുമിച്ചൊരു ഫോട്ടോ എടുത്തു. അത് പോസ്റ്റ് ചെയ്തു. അതിനപ്പുറം ഒന്നുമില്ല. ഞങ്ങൾ നല്ല സുഹൃത്തുക്കൾ മാത്രമാണ്. ഇന്നലെ മുതൽ എനിക്ക് മെസേജ് അയക്കുന്ന എല്ലാ അർജുൻ ദാസ് ആരാധകരോടും പറയുന്നു. അദ്ദേഹം നിങ്ങളുടേതാണ്. ഐശ്വര്യ കുറിച്ചു.
അർജുനൊപ്പമുള്ള ചിത്രം ഐശ്വര്യ ഇൻസ്റ്റഗ്രാമിൽ പങ്കുവച്ചിരുന്നു. ചിത്രത്തിനൊപ്പം ഒരു ഹാർട്ട് ഇമോജിയും ഇട്ടതാണ് വിഷയം ചൂടേറിയ ചർച്ചയാക്കിയത്. ഒപ്പം നടിയുടെ അടുത്ത സുഹൃത്തുക്കൾ ഇരുവരെയും അഭിനന്ദിച്ച് രംഗത്തുവന്നതും ആരാധകരിൽ ആശയക്കുഴപ്പമുണ്ടാക്കി. ഇതോ‌ടെ ഇരുവരും പ്രണയത്തിലാണെന്ന് തമിഴ് മാധ്യമങ്ങളടക്കം റിപ്പോർട്ട് ചെയ്യുകയും ചെയ്തു.
പുത്തം പുതു കാലൈ വിടിയാത എന്ന തമിഴ് ആന്തോളജിയിൽ ഐശ്വര്യയും അർജുനും അഭിനയിച്ചിരുന്നു. അഞ്ച് കഥകൾ ഉണ്ടായിരുന്ന സീരിസിൽ ലോണേഴ്സ് എന്ന കഥയിലാണ് അർജുൻ എത്തിയത്. നിഴൽ തരും ഇദം എന്ന കഥയിലായിരുന്നു ഐശ്വര്യ ലക്ഷ്മി നായികയായെത്തിയത്. കൈതിയിലെ അൻപ് എന്ന കഥാപാത്രത്തിലൂടെയാണ് അർജുൻ സിനിമ ലോകത്ത് ശ്രദ്ധിക്കപ്പെട്ടത്.
