നവാഗതനായ സിന്റോ സണ്ണി തിരക്കഥ രചിച്ച് സംവിധാനം ചെയ്യുന്ന പുതിയ ചിത്രത്തിൽ സൈജു കുറുപ്പ് നായകനാകുന്നു. തോമസ് തിരുവല്ല ഫിലിംസിന്റെ ബാനറിൽ തോമസ് തിരുവല്ല നിർമിക്കുന്ന ചിത്രത്തിന് പേര് ഇട്ടിട്ടില്ല.
ഒരു സിനിമക്ക് ആവശ്യമായ മാറ്റങ്ങളും ചേരുവകളും ചേർത്തുകൊണ്ട് തികഞ്ഞ ഫാമിലി-കോമഡി ഡ്രാമയായിട്ടാണ് ഈ ചിത്രത്തിന്റെ അവതരണം. സംവിധായകൻ ജിബു ജേക്കബും ചിത്രത്തിൽ മറ്റൊരു പ്രധാന വേഷം അവതരിപ്പിക്കുന്നുണ്ട്.
ദർശനയാണ് (സോളമന്റെ തേനീച്ചകൾ ഫെയിം) ചിത്രത്തിലെ നായിക. ഷമ്മി തിലകൻ, ജഗദീഷ്, ജോണി ആന്റണി ,കോട്ടയം നസീർ, ശ്രിന്ധ, ജോളി ചിറയത്ത്, ശരൺ രാജ് എന്നിവർക്കൊപ്പം കടത്തൽക്കാരൻ എന്ന തമിഴ് സിനിമയിലൂടെ ശ്രദ്ധേയനായ ഷിജു മാടക്കരയും ഈ ചിത്രത്തിൽ അഭിനയിക്കുന്നു.
ശ്രീജിത്ത് നായരാണ് ഛായാഗ്രാഹകൻ. എഡിറ്റിംഗ് - രതിൻ രാധാകൃഷ്ണൻ. കോതമംഗലത്തിനടുത്തുള്ള കുട്ടമ്പുഴയും പരിസരങ്ങളുമാണ് ചിത്രത്തിന്റെ ലൊക്കേഷൻ.