വിജയ് നായകനാകുന്ന വാരിസ് എന്ന ചിത്രത്തിന്‍റെ ട്രെയിലർ എത്തി. ഫാമിലി എന്‍റർടെയ്നറായാണ് ചിത്രം എത്തുകയെന്ന് ട്രെയിലറിൽ നിന്നും വ്യക്തമാണ്. വംശി പൈഡിപ്പള്ളി സംവിധാനം ചെയ്ത ചിത്രത്തില്‍ രശ്മിക മന്ദാനയാണ് നായിക.
വളർത്തച്ഛന്‍റെ മരണത്തെത്തുടർന്ന് ബിസിനസ്സ് സാമ്രാജ്യത്തിന്‍റെ ഉടമയാകുന്ന വിജയ് രാജേന്ദ്രൻ എന്ന കഥാപാത്രത്തെയാണ് വിജയ് സിനിമയിൽ അവതരിപ്പിക്കുന്നത്. ശരത് കുമാറാണ് നടന്‍റെ അച്ഛനായി എത്തുന്നത്.
പ്രകാശ് രാജാണ് ചിത്രത്തിലെ മറ്റൊരു പ്രധാന താരം. 13 വർഷങ്ങൾക്കു ശേഷം പ്രകാശ് രാജും വിജയ്‌യും ഒന്നിച്ചെത്തുന്ന ചിത്രമെന്ന പ്രത്യേകതയും വാരിസിനുണ്ട്. എസ്.ജെ. സൂര്യയും ചിത്രത്തിലുണ്ട്. വിജയ്‌യും എസ്.ജെ. സൂര്യയും ഒന്നിക്കുന്ന നാലാമത്തെ ചിത്രമാണ് വാരിസ്.
പ്രഭു, ജയസുധ, ശരത്കുമാർ, ഖുശ്ബു, ശ്രീകാന്ത്, ഷാം, സംഗീത കൃഷ്, സംയുക്ത, യോഗി ബാബു തുടങ്ങിയവരും ചിത്രത്തിൽ പ്രധാന താരങ്ങളാണ്. കാര്‍ത്തിക് പളനി ഛായാഗ്രഹണവും പ്രവീണ്‍ കെ.എല്‍. എഡിറ്റിംഗും നിര്‍വഹിക്കുന്നു.
ശ്രീ വെങ്കടേശ്വര ക്രിയേഷന്‍സിന്‍റെ ബാനറില്‍ ദില്‍ രാജുവാണ് ചിത്രം നിർമിക്കുന്നത്. പൊങ്കല്‍ റിലീസായി തമിഴിലും തെലുങ്കിലും ചിത്രം ജനുവരി 12ന് പ്രദര്‍ശനത്തിന് എത്തും.
